Бүгін соңғы «толаскез»...

Жаңалықтар

16.06.2017, 17:26

Маңғыстау өңірінде алты айға созылған жол жөндеу жұмысы аяқталды. Ералы мен Жетібай станциялары аралығындағы 20 км жол күшейтілген орташа жөндеу көрді. Бүгін соңғы «толаскез». Ағымдағы жылдың 25 қаңтарынан басталған шара теміржолды күрделі жөндеу және қалпына келтіру жұмыстарымен айналысатын Ағадыр машиналандырылған жол дистанциясы күшімен жүзеге асты. Жөндеу жұмыстары кезінде Р-43 типті рельстер алынып, орнына Р-65 типті ауыр рельстер төселді. Бұрынғы төсем – рельс те шпал да 1968 жылы салынған көне материалдар еді. Ауқымды жұмысқа аталған дистанция директорының орынбасары бастаған жол шебері, биргадир, жол монтерлері мен механизаторлар бар, 60-қа жуық адам жұмылып, таңның атысы, күннің батысы тынбай еңбектенгеннің арқасы жоспарланған мерзімде біткелі отыр. Вахталық әдіспен 15 күн жұмыс жасап, 15 күн ауылдарында барып демалып келіп, жұмыс жасап жатқан жігіттердің әрқайсысы өзінің міндетін жақсы біледі. Төбеден төнген күннің қызуына қарамастан жұмыс қызған. ─ Жолшылар дәл қазір ескі жол мен жаңа жолды жалғау үстінде. Жеңіл рельстерді ауырына ауыстырдық. Неге десеңіз, келешекте мұнда жүк тасымалы ұлғаяды. Р-43 - жеңіл әрі біртіндеп айналымнан шығып бара жатқан рельстер. Қазір Қазақстан бойынша Р-65 типті рельстерге қажеттілік жоғары. Міне, мына жерлерде ағаш шпалдар орнаттық. Шіріп кетпесі үшін араларына қиыршық тастар төгіледі, – деп тәптіштей түсіндірген Шамсуддин Аллаяров өзін жол шеберімін деп таныстырды. ─ Өзіңізге мәлім, Өзен – Болашақ темір жолы, одан ары Түркіменстан мен Иранға жол ашылды. Осы жолмен транзиттік жүктердің артуына байланысты бізге мына жолды күшейту міндеті қойылды. Бұл учаскенің ұзындығы Маңғыстау мен Өзен арасында 180 км. Соның 120 км салынды. Яғни, Маңғыстау мен Ералы станцияларының жол арасы толық бітіп тұр. Енді мынау 20 км жол Ералы – Жетібай, 82-ші км мен 102-ші км арасы да жөнделіп, аяқталғалы отыр. Ары қарай, Өзенде, 117-157 км аралықтарында да Р-43 рельстері жатыр. Ол да кезек күтіп тұр, – дейді Ірілендірілген Маңғыстау жол дистанциясы басшысының күрделі құрылыстарды іске асыру жөніндегі орынбасары Жолдас Жетібай өндірістен ақпар беріп. Түсінуімізше, осы қыркүйек айында Жол және имараттарды пайдалану департаменті тағы 25 км жол салуды жоспарлап отырған көрінеді. Сол сияқты келесі жылға 11 бекет пен 12 бекет арасындағы 20 км-ге, жаңа материалдар қолданылып, шпалы – темір бетонды, рельс – түйіспесіз жол салынатын болады деп күтілуде. Ал 2020 жылға дейін 12 мен 13-ші бекеттер, 13-ші бекет пен Шетпенің арасы жаңармақ. Міне, осылай қаңтарда басталған жол жөндеу жұмыстары 6 маусым күні соңғы «толаскез» алынумен мәреге жетті.

Бүгін соңғы «толаскез»...

Басқа да жаңалықтар

Қазақстан теміржолшысы газеті, №55 21 шілде 2026 жыл