Теміржолшылар марапатталды
«Қазақстан теміржолшысы» газетінің тілшісі
Теміржолшылар мерекесі қарсаңында «ҚТЖ» ҰК» АҚ - «Магистральдық желі дирекциясы» филиалының басшылығы салада ұзақ жылдан бері адал қызмет етіп келе жатқан майталман мамандарды марапаттады.
ҚТЖ-ның мәжіліс залында өткен мерекелік жиында «ҚТЖ» ҰК» АҚ басқарма төрағасының орынбасары Талғат Алдабергенов теміржолшылардың марапатын өз қолымен табыстады.
– Бүгінде теміржол ел экономикасында негізгі рөл атқарады. Компания қызметкерлері, соның ішінде саланың негізгі қара күші саналатын Магистральдық желі дирекциясының теміржолшылары осы саланың дамуына зор үлес қосуда. Сол үшін сіздерге зор алғысымызды білдіре отырып, баршаңызды төл мерекемен құттықтаймын, – деді Т. Алдабергенов.
«Құрметті теміржолшы» төсбелгісі екі адамға берілді, бірі – Павлодар магистральдық желі бөлімшесінің директоры Марат Жүнісов болса, екіншісі – Астана-1 станциясы вокзал бастығының кезекші көмекшісі Татьяна Бородина. Сонымен қатар «Адал еңбегі үшін» төсбелгісімен 6 адам марапатталды. Тәуелсіз мемлекеттер достастығы қатысушы-мемлекеттерінің темір жол көлігі бойынша кеңесінің Құрмет грамотасы 1 адамға берілді. Сондай-ақ «ҚТЖ» ҰК» АҚ басқарма төрағасының Құрмет грамотасына 5 адам, Алғыс хатына 4 адам, Магистральдық желі дирекциясы Құрмет грамотасына 4 адам, Алғыс хатына 6 адам ие болды. Оған қоса «Құрмет тақтасына» 1 қызметкер лайық – деп танылды.