Эстетикалық талапқа сай

Жаңалықтар

21.06.2017, 15:12

Семей теміржолшылары тұрақты түрде сенбілік өткізіп, экологиялық екі айлық қорытындыланды. Әсіресе, Аягөз, Шар, Дегелең сынды іргелі станциялар теміржолшылары бір кісідей жұмыла кірісіп, желі бойын жайнатып тастаған. Осыған дейін қарқынды түрде жүргізілген сенбілік жұмыстарының нүктесін қояр болсақ: қала ішін көктей өтетін желі бойының қос қапталындағы қоқыс қалдықтары толықтай тазартылды. Жаңасемей станциясы аумағына қарасты жеке сектор бойындағы тұрғынүйлер кооперативтеріне тиесілі гараждар аумағында қордаланған «қырық жыл» бойғы күлтөкпелер тонналап шығарылды. Бір бұл емес, желі бойындағы қураған бұталар мен ағаштар, көріксіз құрылыс қирандылары да тазартылып, көз жетерлік аумақтар эстетикалық талапқа сай етілді. Мұндай іргелі шаралар екі ай мерзім ішінде бөлімшеге қарасты станциялардың барлығында орын алды. Сол тәрізді нысандар маңайын ретке келтіру, әктеу, әрлеу, жөндеуден өткізу сынды шаралар да орын алып. әсіресе вокзал алаңдары мен перрондарда, Аягөз бен Жаңғызтөбе сынды станцияларда ауқымды жұмыстар жүргізілді. Қарқынды жүргізілген сенбіліктер барысында не бары екі күннің ішінде жүк машиналарымен 150 рейс қоқыс тасымалданған сәттер де орын алыпты. Дегенмен бұл бағыттағы жұмыстарды аяқталды деуге болмайды. Ендігі аралықта айына екі мәрте санитарлық тазалық жүргізу мақсатында жергілікті сала қызметкерлері арасында сенбілік шаралары өткізіліп тұратын болады. Ал қазіргі күні көгалдандыру шараларына ерекше мән берілуде. Өткен жылы семейлік теміржолшылар өз күштерімен 20 мың түп ағаш көшеттерін отырғызған болса, ағымдағы жылы 30 мың тал көшетін екті. Бұл ретте сала мамандарына жергілікті орман шаруашылығының қызметкерлері қол ұшын беріпті. Отырғызылған жас өскіндердің басым көпшілігін қарағай, қайың мен жеміс ағаштарын құрайды. Жол айрықтары мен шағын станцияларды, желі бойларын көгалдандырып, жасыл желекке айналдыру да жоспарда тұр.

Эстетикалық талапқа сай

Басқа да жаңалықтар

Қазақстан теміржолшысы газеті, №55 21 шілде 2026 жыл