Көлік логистикасының көшбасшысы – Қорғаста

Жаңалықтар

21.06.2017, 15:31

Өткен сенбі ҚР Премьер-министрінің Бірінші орынбасары Асқар Мамин мен DP World компаниясы Директорлар кеңесінің төрағасы Сұлтан Ахмед бин Сулайем «Қорғас – Шығыс қақпасы» АЭА мен «Қорғас» ХКЫО нысандарын аралады. Жоғары мәртебелі қонақтар жанында «ҚТЖ» ҰК» АҚ басшысы Қанат Алпысбаев пен Алматы облысының әкімі Амандық Баталов та болды. Көлік логистикасының әлемдік лидері саналатын DP World компаниясы Директорлар кеңесінің төрағасы Сұлтан Ахмед бин Сулайем Қазақстанға Астана экономикалық форумы мен халықаралық «New Silk Way» бизнес-форумына қатысуға келген болатын. Мәртебелі мейман қазақстандық көліктік-логистикалық хабты өз көзімен көруге ықылас танытқаны белгілі болды. Сапар барысында А. Мамин мен С. Сулайем Алтынкөл станциясында болып, қазақ-қытай халықаралық мемлекеттік шекаралық өткелі тұсында орналасқан станцияның техникалық мүмкіндігімен де танысқан. Станция бастығы Жандос Ұнтақбаевтың мәлімдеуінше, биылғы қаңтар, мамыр аралығында Алтынкөл станциясы арқылы 163 контейнерлік пойыз өткен. Ол өткен жылдың сәйкес мерзімімен салыстырғанда жеті есеге жоғары көрсеткіш. Станциядағы инфрақұрылым арқылы тәулігіне 20 контейнерлік пойыз өткізуге болады. Қонақтар АЭА Құрғақ порты аумағында, мониторингілік орталықта да болды. Қазіргі таңда АЭА логистикалық және индустриялық алаңдарында бірқатар жобалар жүзеге асырылуда. «Қорғас-Шығыс қақпасы» АЭА БК» АҚ Бас директорының орынбасары Хишам Белмааши АЭА даму болашағы мен инвестициялық қызметі туралы баяндады. «Қорғас» ХШЫО жобасы мен бас жоспары, шекараның қазақстандық бөлігіндегі инвестициялық нысандар да көрсетілді. Оның ішінде орталық алаң, қолөнершілер қалашығы, бизнес орталығы, көп салалы ғимарат, сауда орталығы бар. Султан Ахмед бин Сулайем «Қорғас-Шығыс қақпасы» АЭА Еуразиялық құрлықта логистикалық жүйені дамытып, бизнесті өркендетіп, инвесторларды тартатын инфрақұрылымы бар, болашағы зор жоба екендігін атап өтті. Айта кетерлігі, «ҚТЖ» ҰК» АҚ мен DP World компаниясы 2013 жылы сәуірде «Қорғас-Шығыс қақпасы» АЭА бірлесіп басқару бойынша ынтымақтастық Келісіміне қол қойған. Енді инвестициялық әріптестікті әрі қарай дамытуға мүдделі.

Көлік логистикасының көшбасшысы – Қорғаста

Басқа да жаңалықтар