Қызылордадан – Түркістанға…

Жаңалықтар

04.07.2017, 10:03

Астана күні қарсаңында Сыр елінің теміржол вокзалынан «Қызылорда – Түркістан» бағытындағы №6843/6844 жолаушылар пойызы жолға шықты. Жаңа бағыт «Қала маңындағы тасымал» АҚ өкілдері мен Қызылорда облыс әкімдігінің келісімімен жүзеге асырылыпты. Жолаушылар пойызының алғашқы сапарын шығарып салуға келгендер арасынан сөз алған Социалистік Еңбек Ері Оразбай Әбішев жергілікті әкімшілік пен «ҚТЖ» ҰК» АҚ басшылығының алыс-жақын елдермен және көрші облыстармен ара қатынасты нығайтып, жолаушылар тасымалын ұйымдастыру жұмыстарына сәттілік тілеп, батасын берді. – Билет бағасы өзге жолаушы пойыздарына қарағанда әлдеқайда арзан, көпшілік үшін қолжетімді. «Қызылорда – Бесарық – Түркістан» қатынасы бойынша бастапқы аялдамадан Қызылорда станциясынан соңғы аялдама Түркістан станциясына дейінгі жол жүру бағасы 1027 теңгені құрайды. Қызылордадан аптасына 5 күн – дүйсенбі, бейсенбі, жұма, сенбі және жексенбі күндері жүретін қаламаңы құрамы небәрі екі вагоннан құралған. Жергілікті тұрғындар тез құлақтанып үлгеріп, билеттің дені сатылып үлгерген, – дейді «Жолаушылар тасымалы» АҚ «Батыс» филиалы ЛБК маманы Жеміс Ғазизқызы. Жаңа құрам Шымкент қаласында жасақталыпты. Жолсеріктер алғашқы вагонға енген жолаушыларға рейс ашу дастарханын жайып қарсы алуда. Бұған дейін іргедегі Түркістанға қатынайтын жолаушы пойызының қатынасы шектелгендіктен жергілікті тұрғындар өзге тасымал көліктерін пайдаланып келсе, алдағы күндерде бөлімшенің оңтүстігінде орналасқан 27 станция мен бекеттерге аялдайтын жолаушы пойызы жолаушысын Түркістан қаласына 6 сағат 40 минутта жеткізсе, 7 сағат 27 минутта кері қайтатын болады. Жолаушылар пойызы Қызылордадан 07 сағат 20 минутта жөнелтіліп, сағат 14-00 де Түркістанға жетеді де, кері бағыттағы пойыз Түркістаннан сағат 07-33-те шығып, Қызылордаға сағат 00-59 минутта келетін болады.

Қызылордадан – Түркістанға…

Басқа да жаңалықтар