Биыл темір жолды белгіленбеген жерден кесіп өткен 35 мыңнан астам адам жауапқа тартылды
Көліктегі полиция департаменті осы жылдың 9 айында 35 мыңнан астам құқық бұзушы белгіленбеген жерден темір жолды кесіп өткепі үшін жауапкершілікке тартылғанын мәлімдеді, , деп хабарлайды Rail-news.kz.
Көлік полицейлері теміржол төсемінде жарақаттану мен жазатайым оқиғалардың алдын алу мақсатында тұрғындар және оқу орындарының оқушыларымен тұрақты негізде профилактикалық кездесулер өткізіп тұрады. Алайда, жүргізіліп жатқан 14 593 алдын алу іс-шараларына (кездесулер, халықпен жиындар, дәрістер және т.б.) қарамастан, азаматтар қауіптілігі жоғары аймақтарда қарапайым қауіпсіздік ережелерін бұзуды жалғастыруда, бұл өз кезегінде қайғылы жағдайларға әкеп соғады.
«2024 жылдың басынан бастап темір жол бойында адамдардың, үй жануарларының болуына және бөгде заттарды қоюына байланысты Көліктегі ПД-да пойыздардың шұғыл тежелуінің 1684 фактісі тіркелді. Белгіленбеген жерлерден темір жолды кесіп өткені үшін 35 607 азамат әкімшілік жауапкершілікке тартылды», - делінген хабарламада.
Осы жылдың 9 айында жылжымалы құрамның астына өз абайсыздықтарынан 74 азамат түсіп, олардың жартысынан көбі өліммен аяқталды.
Мәселен, 9 қазанда «Алматы-1 – Медеу» аралығында жүк пойызының машинисі теміржол төсемін белгіленбеген жерден өткен 59 жастағы ер адамды жанай қағып кетті. Осыған байланысты темiржол көлiгi жүрісі немесе оларды пайдалану қауiпсiздiгi қағидаларын бұзу фактісі бойынша қылмыстық іс қозғалды.
Тергеу жүргізілуде.
Азаматтарды қауіпсіздік ережелерін сақтауға және белгіленбеген жерлерде теміржол арқылы өтпеуге шақырамыз.
Өту үшін арнайы жабдықталған жаяу жүргіншілер өткелдерін (туннельдер, көпірлер) пайдалану қажет.