Мас екі жолаушы пойыз бригадасына бағынбаған
Тараз станциясындағы желілік полиция бөлімінің қызметкерлері «Түркістан-Павлодар» бағытындағы жолаушылар пойызын патрульдеу кезінде екі құқықбұзушыны анықтап, ұстады, деп хабарлайды Rail-news.kz.
Көліктегі полиция департаменті бастығының міндетін атқарушы Мадияр Айтуғановтың айтуынша, тексеру барысында полицейлер Түркістан облысының 21 және 22 жастағы екі тұрғынын анықтаған. Ішімдікке сылқия тойып алған екі жігіт вагондардың бірінің тамбурында темекі шегіп, пойыз бригадасының ескертулеріне құлақ аспаған.
«Құқықбұзушылар алкогольдік ішімдіктерді ішкені немесе қоғамдық орындарға масаң күйінде келгені және темекі бұйымдарын тұтынуға тыйым салуды бұзғаны үшін әкімшілік жауапкершілікке тартылып, 20 АЕК айыппұл салынды», - деді полиция полковнигі.
Естеріңізге сала кетейік, ағымдағы жылдың басынан бері көлік полицейлері алкогольдік ішімдіктерді ішкені немесе қоғамдық орындарға масаң күйінде келгені үшін – 6360, ал темекі өнімдерін тұтынуға тыйым салуды бұзғаны үшін – 2234 құқықбұзушыны әкімшілік жауапкершілікке тартты.