Темір жолды кесіп өткен 43 мыңнан астам азамат әкімшілік жауапкершілікке тартылды
Көліктегі полиция департаментінің қызметкерлері теміржол ұйымдарымен бірлесіп жазатайым оқиғалардың алдын алу және жолын кесу мақсатында халықпен, жолаушылар пойыздарында және оқу орындарында тұрақты негізде профилактикалық іс-шаралар өткізіп тұрады. Барлық іс-шараларда теміржол көлігі объектілерінде болған кезде қауіпсіздік ережелерін сақтау мәселесі жеткізіледі, деп хабарлайды Rail-news.kz.
Көліктегі полиция департаментінің мәліметінше, осы жылдың 11 айында Департаментте пойыздың шұғыл тежелуінің 2115 фактісі тіркелді, оның ішінде темір жолда адамдардың болуы салдарынан – 320. Барлығы 43 212 азамат темір жол төсемін белгіленбеген жерлерден кесіп өткені үшін әкімшілік жауапкершілікке тартылды. Сондай-ақ, өткен кезеңде жылжымалы құрам 83 азаматты қағып кетсе, оның жартысынан көбі өліммен аяқталды.
Мәселен, өткен демалыс күндері екі адам пойыз астына түсіп кете жаздады. Бұл фактілер Астана және Шу станцияларында тіркелді. Абырой болғанда, машинистер шұғыл тежеу қолданып теміржол құрамын тоқтатуға үлгеріп, қайғылы жағдайдың алдын алды. Құқық бұзушылар белгiленбеген жерлерде темiржол арқылы өткені үшін әкімшілік жауапкершілікке тартылды.
Көлік полицейлері азаматтарды теміржолды тек арнайы жерлерден, яғни жаяу жүргіншілер төсемі, жерасты және жер үсті өткелдері арқылы өтуге шақырады. Темір жолды құлаққап киіп алып өту, сондай-ақ, тоқтап тұрған пойыздың астынан немесе вагондардың үстіне көтеріліп өту өте қауіпті. Мұның соңы қайғылы жағдайға әкеп соғуы мүмкін. Естеріңізге сала кетейік, теміржолда аса мұқият болу керек, өйткені бұл қауіптілігі жоғары аймақ.