Астанада жастар құрылтайы өтті

«ҚТЖ» ҰК» АҚ-да ХІІІ республикалық жастар форумының ресми ашылу салтанаты өтті. Үш күн бойы Астананы дүбірге бөлеген жиынға өңірлерден 250-ге жуық жастар қатысты. Форумның беташарын арнайы киім киген жүзден аса жас «Еңбек адамы – ҚТЖ құндылығы» флешмобымен ашты. Осылайша олар 2025 жыл – Жұмысшы мамандықтары жылына қолдау білдірді.

Форумның ашылу салтанатында «ҚТЖ» ҰК» АҚ Әкімшілік ғимаратының 3-қабатындағы мәжіліс залының фойесіне қойылған жастардың әртүрлі жобалары қонақтар мен сарапшылар назарына ұсынылды. Биыл 37 жобаның арасынан ең үздік деп танылған 15 жоба іріктеліп алыныпты. Жобаны әзірлеген командалардың көшбасшылары жобаның мақсаты, шешімі, күтіліп отырған нәтижесі және ағымдық мәртебесі туралы қысқаша баяндады.

«ҚТЖ жастарға ерекше көңіл бөліп келеді. Білікті мамандарды даярлау және олардың бастамаларына қолдау білдіру – Компанияның даму стратегиясының және кадр саясатының маңызды құраушы жиынтығы. Сондықтан бүгінгі форум ақпарат алудың, өзекті мәселелерді талқылаудың және жастарды ынталандырудың тиімді алаңы. Осы форумға жиналғандар 2024 жылы өткізілген байқаулар мен жобалардың жеңімпаздары. Әсіресе мен биыл мыңнан астам іс-шараларды өткізген біздің компания еріктілерінің ерекше еңбектерін атап өткім келеді. Сіздер бірінші болып тасқын судан зардап шеккендер мен атқарушы органдарға қолұшын бердіңіздер. Сонымен қатар волонтерлер «Таза Қазақстан» мемлекеттік бастамасының қозғаушысы бола білді. Еріктілер қозғалысын қолдау аясында компания «Корпоративтік волонтер мектебі» форумы мен «ҚТЖ» ҰК» АҚ Үздік корпоративтік волонтері» байқауын өткізіп келеді, бұлардың баламасы «Самұрық-Қазына» портфельдік компаниялар арасында бірде-біреуінде жоқ», – деді форумның ашылу салтанатында сөз сөйлеген «ҚТЖ» ҰК» АҚ Аппарат жетекшісі Серік Кеулімжаев.  

Сонымен қатар ол Мемлекет басшысы 2025 жылды – Жұмысшы мамандықтарының жылы деп жариялағанын, бұл өз кезегінде өндірістік персоналды дамыту мен қолдау саласында Компания іске асырып отырған саясатқа жаңа серпін бергенін, осыған орай өндірістік персонал қатарындағы жас еңбеккерлер әртүрлі іс-шараларға, оның ішінде халықаралық шараларға қатысатынын атап өтті.  

Ресми ашылу салтанатынан кейін форум жұмысы «Жұмысшы мамандықтары жылы: Мақсат. Болжам. Іске асыру» тақырыбындағы панелдік пікіралмасуға, «Тіл құбылысының ұлттық мазмұны және мемлекеттік мәртебесі», тағысын тағы тақырыптағы шеберлік сабақтарына ұласты. Форум жұмысы жайлы толыққанды материал газеттің келесі санында жарияланады.