Майлытоғайға денсаулық келді

Жаңалықтар

11.08.2017, 10:39

Шілде айының 16 жұлдызынан бастап Сыр өңіріне бет бұрған «Денсаулық» медициналық пойызын біз Майлытоғай бекетінде қарсы алдық. Артынып-тартынып келген көздің жауын алған қызыл вагондардан құралған пойызды шағын бекет халқы түгел жол бойына шығып күтіп алды. Көпшілікпен амандасып, жұмыс тәртібі мен кестесімен таныстырған дәрігерлер уақыт ұттырмай бірден жұмысқа кірісті. Түске дейін 98 адамды қабылдап, ем-дом көрсеткен ақ халаттылар алды бос болмады. Түскі үзілістен кейін де қауырт жұмыс жалғасып жатты. –Ауылға келген дәрігерлердің қабылдауында болып, тексеруден өтіп жатырмыз. Егер осы пойыз болмағанда аудан орталығына сабылып уақыт өткізер едік, осындай пойыздарды ұйымдастырып, бекет тұрғындарына мүмкіндік жасаған азаматтарға, алғысымды жеткізіңіздер, – деп ризалығын білдірді жергілікті тұрғындар атынан Бақытжан Сейітов. «Денсаулық» пойызының бүгінгі құрамында қызылордалық 9 дәрігер мен 14 медбике қызмет жасауда. Пойыз құрамы бір күнде орта есеппен екі жүзден аса адамды қабылдайды екен. Бұл жолғы «доңғалақ үстіндегі емхананың» бұған дейінгі құрамдардан өзгешелігі балаларға арнайы сый ретінде ойын атракциондарымен жасақталған багаж-вагоны тіркелген екен. Бұл туралы соңғы он жыл көлемінде пойыз бастығы қызметін атқарып жүрген Дүйсен Балымбетов айтып берді. –Пойыз құрамында 11 жолсерік, 1 электромеханик, 1 дизельші, 4 аспаз бен тіркеме вагондағы атракциондардың операторы Ержан Күренкеевтер қызмет етіп келеді. Аялдаған бекетте дереу атракциондарды іске қосып, жергілікті балалар дәрігерге қаралумен қатар асыр салып ойнап қуанып жатыр. Олар үшін аэрохоккей, тир, батут, әткеншектер, столды теннис пен футбол және күш сынағыш секілді атракциондар үлкен тосын сый болуда. Батутты арнайы желдеткіштермен бекет алаңқайына орналастырамыз да бекеттен жүрер алдында қайта жинастырып аламыз, – дейді ойын алаңының жұмысын өзі басқарып жүрген пойыз бастығы. Пойызды қажетті ауыз сумен, электрмен, байланыспен аймақтағы салалық мекеме теміржолшылары қамтамасыз етсе, вагон сыртындағы қоғамдық тәртіптің сақталуын ӘТЖК күзетшілері қадағалауда екен.

Майлытоғайға денсаулық келді

Басқа да жаңалықтар

Қазақстан теміржолшысы газеті, №15 27 ақпан 2026 жыл