Huawei темір жолға LTE-R орналастыруды бастайды
2025 жылғы 20 ақпанда Шэньчжэнь қаласында "Huawei Technologies Co. Ltd." компаниясын басқарып отырған Лян Хуа мырза "ҚТЖ" ҰК" АҚ басшысы Нұрлан Сауранбаевты қабылдады, деп хабарлайды Rail-news.kz.
Тараптар бұрын қол жеткізілген уағдаластықтардың іске асырылу барысын талқылап, 2024 жылдың қорытындысы бойынша жобалардың сәтті орындалғанын атап өтті. Бүгінгі таңда деректерді беру желілерін жаңғырту және бұлтты технологияларды енгізу, пилоттық LTE-R ұялы байланыс стандарты бойынша жұмыстар аяқталып отыр. Жасанды интеллект енгізу басталды.
Кездесуде одан әрі өзара іс-қимылдың перспективалары айқындалды. Компаниялар 2025 жылы жетекші қазақстандық операторлардың ("Қазақтелеком" АҚ, "ТТС" АҚ және т.б.) қатысуымен Трансқазақстандық теміржол дәлізінде LTE-R желісін ауқымды орналастыруды бастауға келісті.
Жолды тексеру және шағын жөндеу үшін өнеркәсіптік роботтарды қолдану перспективалары қарастырылды. Сондай - ақ, басшылар Қазақстанда AI-технологияларға маманданған инновациялық білім беру орталығы - "Болашақ колледжін" құруда Huawei-мен ынтымақтастықты талқылады.
Компаниялар негізгі бастамаларды қаржыландыруды растады және 2025 жылға арналған бірлескен жобалардың жол картасын бекітті.