ҚТЖ-да Словения компанияларымен кездесу өтті
ҚТЖ басшылығы Словения компанияларының (Actual IT Group, Riko, Kontron, SOP International) өкілдерімен көлік және логистика саласындағы ынтымақтастық мәселелері бойынша кездесу өткізді, деп хабарлайды Rail-news.kz.
IT-шешімдер, логистика, энергетика және көлік инфрақұрылымы, сондай-ақ теміржол өнеркәсібі саласындағы компания басшылары Словения Президенті Наташа Пирц-Мусар делегациясының құрамында ресми сапармен Қазақстанға келді.
Тараптар көлік-логистикалық байланыстарды кеңейту мүмкіндіктерін, Транскаспий халықаралық көлік бағдарын дамыту шеңберіндегі ынтымақтастық мәселелерін, порттар мен логистикалық орталықтар үшін цифрлық өнімдер бөлігінде бірлескен жобаларды әлеуетті іске асыруды, магистральдық теміржол желісін электрмен жабдықтау құрылғыларын жаңғыртуды және т.б. талқылады.
Кездесуге қатысушылар екі елдің ынтымақтастығын одан әрі кеңейтуге бағытталған бірлескен жұмысқа дайын екендіктерін білдірді.