ҚТЖ басшылығы Алматыдағы инфрақұрылым құрылысының барысымен танысты
“Қазақстан темір жолы" ҰК" АҚ басшылығы Алматыға жұмыс сапары барысында Қазақстанның көлік-логистикалық инфрақұрылымын дамытуға және Қытаймен екіжақты ынтымақтастықты тереңдетуге бағытталған негізгі нысандарды аралады, деп хабарлайды Rail-news.kz.
"Кедентранссервис" АҚ ("ҚТЖ" ҰК" АҚ еншілес ұйымы) және Xi ' an Free Trade Port Construction and Operation Co. Ltd (ҚХР) бірлескен кәсіпорны шеңберінде салынып жатқан ГТС-2 терминалында логистикалық кешен құрылысының барысымен танысуға ерекше назар аударылды. Бұл кешен халықаралық көлік-логистикалық тізбектің маңызды бөлігіне айналады.
Сонымен қатар, Алматы облысындағы Қазыбек Бек станциясында көліктік-логистикалық хаб құру жобасы қаралды.
Жаңа кешен сауда-экономикалық байланыстарды дамытуға және екі елдің транзиттік әлеуетін кеңейтуге ықпал ете отырып, Қазақстан мен Қытайдың логистикалық жүйелерін интеграциялаудың негізгі буыны болады.
Халықаралық көлік дәліздерінің негізгі учаскелерінің бірі ретінде Алматы облысының стратегиялық маңызы және транзиттік мүмкіндіктерді күшейту мен Қазақстанның әлемдік логистикалық нарықтағы позициясын нығайту үшін өңірдің инфрақұрылымын одан әрі дамытудың маңыздылығы атап өтілді.