Студент темір жол станциясында суицид жасамақ болған азаматты құтқарып қалды
2025 жылғы 14 мамырда сағат 17:10 шамасында Қостанай теміржол станциясында қайғылы оқиға орын ала жаздады. Көпірден секірмек болған азаматты 18 жастағы студент құтқарып қалды, деп хабарлайды Rail-news.kz.
Көліктегі полиция департаментінің мәліметінше, перронды күзетіп жүрген Қостанай станциясындағы желілік полиция бөлімінің патрульдік полицейі Арсен Әбілмажинов жаяу жүргіншілер көпірінде ер адамның күмәнді әрекетін бірден байқаған. Ол көпірдің қоршауынан асып, өз-өзіне қол жұмсамақ болған.
Полиция кіші сержанты Әбілмажинов бір сәтте ойланбастан көпірге қарай жүгірді. Сол сәтте көпірдің үстінде 18 жастағы Аян Карбаев есімді жаяу жүргінші келе жатқан. Полицейдің «Ұста оны!» деген дауысы естілгенде, жас жігіт өз қауіпсіздігін ойламай, асқан жылдамдықпен ер адамның қолынан шап беріп, ұстап қалады.
Ер адамның қарсыласқанына қарамастан, оқиға орнына дереу жеткен полицей бар күш-жігерімен қоршаудың арғы жағында тұрған азаматты қауіпсіз жерге шығарып алады. Арсен шарасыз күй кешкен азаматты тыныштандырғаннан кейін полицияның кезекші бөліміне хабар береді.
«Бірден оқиға орнына тергеу-жедел тобы мен Қостанай станциясының ЖПб басшылығы келді. Тексеру барысында, 29 жастағы қала тұрғынының ауыр эмоционалды күйде болғандығы белгілі болды. Қостанай станциясының ЖПб қызметкерлері күйзеліске ұшыраған азаматқа психологиялық көмек көрсетіп, оқиғаның барлық мән-жайын анықтау жұмыстарын бастады», - делінген хабарламада.
Тәртіп сақшысы мен студенттің бұл жанкешті әрекеттері бірлескен әрі батыл қадамның жарқын үлгісі болды.
2024 жылғы тамызда ішкі істер органдарына қызметке орналасқан Арсен Серікұлы Әбілмажинов тек кәсібилігін ғана емес, сонымен қатар жоғары адамгершілік қасиеттерін көрсете білді. Қажет кезде шұғыл шешім қабылдай білудің арқасында бір адамның өмірі аман қалған.
Ахмет Байтұрсынов атындағы Қостанай мемлекеттік университеті заң факультетінің студенті Аян Төлегенұлы Карбаевтың да тәуекелге бел бууы ерекше құрметке лайық. Ол қиын сәтте көмек қолын ұсынды.
Департамент басшылығы патрульдік полицейі Арсен Әбілмажинов пен Аян Карбаевтың іс-әрекетін жоғары бағалады. Алдағы уақытта оларды көрсеткен ерлігі, қайсарлығы және белсенді азаматтық ұстанымы үшін марапаттау туралы шешім қабылдамақ.