Марат Қарабаев Аустрияның Федералдық темір жолдары басқарма төрағасы Андреас Маттэмен кездесті
Кездесу барысында тараптар Қазақстан мен Аустрия арасындағы теміржол тасымалы мен логистика саласындағы екіжақты ынтымақтастықты нығайту мәселелерін талқылады, деп хабарлайды Rail-news.kz.
Әсіресе тәжірибе алмасу, инновациялық технологияларды енгізу және ұлттық операторлар арасындағы әріптестікті кеңейтуге баса назар аударылды. Транскаспий халықаралық көлік бағытының (ТХКБ) стратегиялық рөлі атап өтілді.
Тараптар «Орталық Азия – Еуропа» бағыты бойынша инфрақұрылымды дамыту мен логистикалық тораптарға инвестициялар тарту, соның ішінде теміржол желілерін жаңғырту, мультимодальды терминалдар салу және жеке инвестицияларды тартуға қолайлы жағдай жасау мәселелерін пысықтаудың маңызын атап өтті.
Кездесу қорытындысы бойынша тараптар нақты жобаларды бірлесіп жүзеге асыруға дайын екендерін білдірді.