Спорт мерекесі мәреге жетті

Жаңалықтар

05.09.2017, 12:10

Жадыраған жаздың соңғы айы, соңғы күндері... Бір аптаға созылған «ҚТЖ» ҰК» АҚ-ның жазғы спорт түрлері бойынша республикалық спартакиадасы мәреге жетті. Ерік-күш пен еркіндіктің мерекесі Жер жәннаты Көкшенің Бурабайына он төрт жол бөлімшесі мен әуе, су және авто көлік түрлерінен 150 ден астам кіл жүйрік спортшыны жинап, спорттың алты түрінен аламан жарыс өткізді. Қазақстанның салалық темір жол, автомобиль, әуе және су көлігі кәсіподағы қызметкерлерінің 25 жылдығына арналған республикалық жарыс Ақмола аймағындағы Жақсы-2 спорт базасында, Бурабай ауданында өтті. Жаздың аяқталғанына қарамастан, тамыздың соңғы күндері жарысқа қатысушыларды ыстық ауа-райымен қуантты. Солтүстікке келген оңтүстік өңірдің азаматтары жанға жайлы жылы күнде, өздерін өз үйлерінде жүргендей сезінетіндерін жеткізді. Біреулері солтүстіктің салқын желі мен жаңбырынан қорқатындарын да жеткізді, бірақ та ашық аспан тартысты жарыстың жайлы өтуіне септігін тигізді. Теміржолшылар жарыстың жоғары деңгейде ұйымдастырылғанын атап өтті, әсіресе, оларға шара өтіп жатқан жер ұнады. –Бізге табиғаты сұлу Бурабай баурайында болып, оның әсем келбетін көру және уақытты тамаша өткізу мүмкіндігі туды. Бұл бір жағынан кезектен тыс демалыс болды, біз бұл жерде ой мен дене еңбегін қажет ететін жұмыстан босап және уақытымызды ауасы мен суы жанға шипалы аймақта өткізіп жатырмыз, – деп қуаныштарымен бөлісті жарысқа келген қонақтар. Республикалық спартакиадаға Ұлттық құрама төрешілері мен түрлі спорт бойынша төрешілер алқасы қазылық етті. Әрбір жарыс алдында қатысушыларға ережелер толық түсіндірілді. Жарысқа еліміздің 14 аймағынан қатысты. Әр команда құрамында 11 адамнан болды. Спартакиада кір тасын көтеру, дартс, жеңілатлетикалық кросс, волейбол, үстел теннисі, жеңілатлетикалық эстафеталық жүгіру сияқты спорт түрлерінен өтіп, аламан жарыста бар өнерін салған аймақ иелері, яғни ақмолалық теміржолшылар намысты қолдан бермей, топ жарып, жүлделі бірінші орынды иемденді.

Спорт мерекесі мәреге жетті

Басқа да жаңалықтар

Қазақстан теміржолшысы газеті, №16 03 наурыз 2026 жыл