«Қазтеміртранс» нарық сұранысын қанағаттандыруда
«Қазақстан теміржолшысы» газетінің тілшісі
ҚТЖ-ның еншілес ұйымы жүк вагондары паркінің операторы «Қазтеміртранс» АҚ еліміздегі теміржол көлігі бойынша жүк ағынының 40 пайыздан астамын қамтамасыз етіп отыр.
Компания паркі жыл сайын түрлі типті жаңа вагондармен толығып отыр. 2024 жылдың өзінде 2 мыңнан астам вагон сатып алынған.
– Бұл – ұлттық оператордың тек есеп үшін емес, сұраныстар мен ұсыныстар теңгерімін сақтау үшін жүргізіп отырған жұмысы. Компания тек құр сатып алуға ғана емес, нақты нарық сұранысына қарай ғана вагондар алуға басымдық береді. Операторлық бизнес – көптеген факторларға тәуелді, атап айтқанда геосаяси жағдайдан бастап табиғат жағдайына дейінгі өзгерістерге бағынышты. Мұндай жағдайда тұрақтылық сақтау өте маңызды. Компания еліміздегі парктердің үштен біріне ие, бірақ бәсекелес ортада жүмыс істейді және монополиялық тәртіппен жүрмейді. Сервистік байланысқа, ұзақмерзімді келісімшарттарға басымдық беріледі, – дейді «Магистраль-Live» сарапшылар алаңында сөйлеген сөзінде «Қазтеміртранс» АҚ маркетинг және тариф саясаты жөніндегі басқарушы директоры Абылайхан Жарлықпай.
Спикердің баяндауынша, компания вагондарды бөлудің автоматтандырылған жүйесін енгізуде. Бұл нақты алгоритмдер бойынша жүзеге асырылып, адами факторды болдырмайды және айқындылықты қамтамасыз етеді. Жылдың соңына дейін бұл жүйе сынақтық пайдалану кезеңіне өтеді.
Бүгінде ҚТТ тау-металлургиялық холдингтер мен аграрлық және мұнай химия кәсіпорындарын қоса алғанда 1200-ден астам компаниялармен өзара іс-қимыл жүргізеді. Компания тасымалды субсидиялаудың мемлекеттік бағдарламаларына қатысып, ТХКБ бойынша Орта дәлізді дамытуға белсенді қолдау білдіреді. Әсіресе Қытай, Өзбекстан, Каспий маңы елдері және одан әрі Еуропаға бағытталатын бағдарларға ерекше көңіл бөледі. Былтырғы жылы КТТ вагондарымен 160 млн тоннадан астам жүк тасымалданған.