ҚТЖ трансұлттық мультимодальды компания ретінде қалыптасуда – Жақыпов

Мемлекет басшысының еліміздің көлік-логистикалық әлеуетін дамыту жөніндегі тапсырмаларын орындау шеңберінде Қазақстанда «ҚТЖ» ҰК» АҚ-ның толыққанды трансұлттық мультимодальды компания ретінде қалыптасуына бағытталған жобалар жүзеге асырылуда, деп хабарлайды Rail-news.kz.

Бұл туралы Үкімет отырысында «Самұрық-Қазына» АҚ Басқарма төрағасы Нұрлан Жақыпов мәлімдеді. Оның айтуынша, бүгінгі таңда Шанхайдан Роттердамға теңіз арқылы жүк жеткізуге Суэц каналы ашық болған жағдайда шамамен 60 күн қажет. Ал Қазақстан арқылы жүк жеткізу мерзімі 16 күннен аспайды.

«Жалпы "Қытай – Еуропалық Одақ – Қытай" бағыты бойынша еліміздің аумағы арқылы жүк ағынының 85%-ы өтеді», — деп атап өтті Нұрлан Жақыпов.

Транзитті арттыру мақсатында сыртқы және ішкі инфрақұрылымдардың құрылысы жүруде. Соның ішінде халықаралық терминалдар желісі салынуда. Қытайдың Ляньюньган және Сиань порттарында қолданыстағы терминалдарға енді Чэнду қаласындағы қуат көздерін қосу жоспарланған. Одан бөлек Ресей (Селятино ст.), Беларусь (Свислочь ст.), Әзербайжан (Алят порты), Мажарстан (Будапешт қ.) елдерінде жобалар жүзеге асырылып жатыр. Болашақта Грузия, Румыния және Болғария порттарын қамтып кету жоспарда бар.

«Осылардың бәріне қосымша, транзиттік жүк ағынын ұлғайту мақсатында Қытаймен үшінші шекаралық өткел – "Бақты-Аягөз" теміржол желісінің құрылысы басталды. Теңіз тасымалы қызметтерін кеңейту мақсатында контейнер таситын кемелер сатып алынады. Сондай-ақ Каспий теңізі порт айлағының түбін тереңдету жұмыстары жүргізілуде. Әуемен жеткізу қызметі де дамуда. Мысалы, жүк тасымалдайтын авиакомпания ашу көзделген», — деп атап өтті Нұрлан Жақыпов.