ҚТЖ: Алматы облысында Агро-индустриялық паркті дамыту бойынша ынтымақтастық туралы келісімге қол қойылды

Мәскеу облысында (РФ) өткен халықаралық Көп салалы бизнес-миссия аясында «Қазақстан темір жолы» ҰК» АҚ – «KTZ Express» АҚ еншілес компаниясы Алматы облысындағы Агро-индустриялық парк жобасын іске асыру бойынша ынтымақтастық туралы келісімге қол қойды, деп хабарлайды Rail-news.kz.

KTZ Express, «Славтранс-Сервис» АҚ (РФ) және «Алатау КЛО» ЖШС арасында қол қою рәсімі Алматы облысы әкімі мен Мәскеу облысы губернаторының қатысуымен өтті, бұл бастаманың жоғары деңгейі мен өңіраралық ауқымын көрсетеді.  

Тараптар жобаны дамыту және ілгерілету бойынша бірлескен жұмыс туралы уағдаласты. Агро-индустриялық парк Алматы маңында салынып жатқан Алатау қаласында (Alatau city) орналасады.  

Оның инфрақұрылымы заманауи «А» класты қойма кешенін, мультитемпературалы қоймаларды, контейнерлік терминалды, көтерме-бөлшек сауда орталығын, сондай-ақ фитосанитариялық бақылау және кедендік ресімдеу аймақтарын біріктіреді. Жаңа нысан өндірушілердің, экспорттаушылардың және сауда желілерінің мүдделері бірыңғай жүйеге қосылатын көпфункционалды хабқа айналады.  

Жоба Қазақстан Президенті белгілеген басымдықтарға: экспортты дамыту мен отандық өнімді шетелдік нарықтарға жылжытуға тікелей жауап береді. Жаңа парк логистика тиімділігін арттырып қана қоймай, өндірушілер үшін жаңа тарату арналарына қол жеткізе отырып, ыңғайлы орта құруға мүмкіндік береді. Қазақстандық компаниялар халықаралық нарықтарға тезірек және оңай шыға алады, ал өңір экономикалық өсу үшін қуатты серпін алады.  

ҚТЖ үшін жобаға қатысу Қазақстанның логистика саласындағы ұстанымын күшейтетін және елдің экспорттық әлеуетін дамыту үшін жаңа мүмкіндіктер туғызатын стратегиялық қадам болып табылады.  

Компанияның халықаралық жобаларының тәжірибесі, соның ішінде Мәскеу облысындағы (РФ) CRK Terminal қоса алғанда жаһандық жеткізу тізбегіне интеграцияланған ауқымды бастамаларды іске асыруға дайын екендігін растайды.