Қазақстан мен Қытай шекара маңындағы станциялардың ауысымдық қызметкерлерін өзара орналастыру туралы келісімге келді
Қазақстан Республикасы мен Қытай Халық Республикасы арасындағы шекаралық өткелдердің жұмыс тиімділігін арттыру, сондай-ақ жүк қабылдау мен тапсыру процесін үздіксіз қамтамасыз ету мақсатында «Қазақстан темір жолы» ұлттық компаниясы» АҚ мен Қытай темір жолдары шекара маңындағы темір жолдар жөніндегі бірлескен комиссиялар отырысының қорытындысы бойынша шекара станцияларының ауысымдық қызметкерлерінің өзара аумаққа кіру тәртібі жөнінде келісімге келді, деп хабарлайды Rail-news.kz.
«ҚТЖ» ҰК» АҚ-ның Достық және Алтынкөл станцияларында ҚХР ауысымдық қызметкерлерін орналастыруға арналған ғимараттарды жөндеу және жаңғырту жұмыстары аяқталды. Сондай-ақ Қытай қызметкерлерінің қауіпсіз еңбегі мен жайлы тұруына барлық қажетті жағдай жасалды.
Жеткен келісімдер қолданыстағы шектеулерді жоюға, әкімшілік рәсімдерден өту уақытын қысқартуға, шекара маңындағы станциялардың өткізу қабілетін арттыруға, жүк құжаттарын өңдеу процесін жеделдетуге және Қазақстан мен Қытай арасындағы теміржол көлігі саласындағы ынтымақтастықты одан әрі дамытуға мүмкіндік береді.
Екі тараптың ауысымдық қызметкерлерін көршілес станцияларға жіберу 2025 жылдың желтоқсан айына жоспарланып отыр.