Жаңа теміржол тарифі Қазақстанның магистральдық желісін дамытуды қамтамасыз етеді
2025 жылғы шілдеде қолданыстағы тарифтік кезеңнің қолданылу мерзімінің аяқталуына байланысты «ҚТЖ» ҰК»АҚ Табиғи монополияларды реттеу комитетіне магистральдық теміржол желісінің реттеліп көрсетілетін қызметтеріне жаңа тарифті бекітуге өтінім жіберді, деп хабарлайды Rail-news.kz.
Жаңа тарифті енгізу 2026 жылғы 1 қаңтардан бастап жоспарланып отыр. 2025 жылғы 28 қазанда Комитет бизнес, салалық қауымдастықтар және өзге де мүдделі тараптар өкілдерінің қатысуымен қоғамдық тыңдаулар өткізді. Тыңдаулар барысында компания тарифтік сметаның жобасын және тариф деңгейінің мәлімделген өзгеруінің негіздемесін ұсынды.
Тарифтің өзгеруінің негізгі себебі «Мойынты-Қызылжар», «Бақты-Аягөз», «Алтынкөл-Жетіген», «Бейнеу-Маңғыстау» учаскелерін салу мен жаңғыртуды, жалпы ұзындығы 2 000 км астам желілерде автоматты және жартылай автоматты бұғаттау жүйелерін орнатуды қамтитын теміржол инфрақұрылымын дамытудың инвестициялық бағдарламасын іске асыру, сондай-ақ 11 мың км жолдың жөнделуін қамту мақсатында жол шаруашылығына күрделі жөндеу жүргізу қажеттілігі болып табылады.
Іс-шаралар ел басшылығының тапсырмасы бойынша орындалуда және магистральдық желіні дамытуға және оның тозуын төмендетуге бағытталған. Оларды іске асыру Қазақстан Республикасының 2029 жылға дейінгі ұлттық даму жоспарын, көлік-логистикалық әлеуетті дамытудың 2030 жылға дейінгі тұжырымдамасын және теміржол көлігін дамытудың 2029 жылға дейінгі тұжырымдамасын қоса алғанда, мемлекеттік даму бағдарламаларында көзделген.
Тарифтердің қолданыстағы деңгейі магистральдық желіні күтіп ұстауға және жаңартуға жұмсалатын нақты шығындардың жабылуын қамтамасыз етпейді және ұзақ мерзімді инфрақұрылымдық даму жобаларын іске асырудың кіріс көзін қалыптастырмайды.«ҚТЖ» ҰК» АҚ нарықты алдағы өзгерістер туралы уақтылы хабардар ете отырып, ашық тарифтік саясат қағидаттарын ұстанады.
Мұндай талқылаулар «Атамекен» ҰКП алаңында іскерлік қоғамдастық өкілдерінің қатысуымен бірнеше рет өткізілді.Компания инвестициялық шығындарды қайтаруды және магистральдық теміржол желісінің жұмыс істеуінің тұрақтылығын қамтамасыз ететін өтінімді қарау қорытындылары бойынша салмақты шешім қабылдауды күтеді.