Қызмет көрсету пункті ашылды

Жаңалықтар

17.10.2017, 15:50

Тараз вокзалында мүмкіндігі шектеулі жолаушыларға қызмет көрсету пункті ашылды. Вокзалда кемтар жандарға арналған пункттің ашылғанына көп уақыт бола қоймаса да, бірқатар азаматтар қызмет алып үлгерген. – Бұрын арбаға таңылған жандар біреудің көмегіне мәжбүр болатын. Енді оларға вокзалда арнайы қызмет көрсететін пункт бар. Мәселен, вокзал ғимаратына келген мүмкіндігі шектеулі азамат қоңырау шалу арқылы біздің қызметкерлерді көмекке шақыра алады. Және №4-ші касса осы жандарға қызмет көрсету үшін ыңғайландырылып жасалып отыр. Вокзал ішінде және перронда мүмкіндігі шектеулі азаматтарға арнайы орындар қарастырылды. Нашар еститін азаматтар үшін индукциондық панель, мүгедектерге арналған арбалар, балдақтар дайындалып, медициналық қызмет көрсету орталығы да жасақталды. Арнайы әжетхана да қарастырылып отыр. Вокзал қызметкерлері ол азаматтардың пойызға мініп, түсуіне де көмек көрсетеді. Тіпті, вокзалда арнайы демалыс бөлмесі де қарастырылған, онда ерекше жолаушыларға шәй, сусындар ұсынылып, жаднама таратылады,– дейді Тараз вокзалы бастығының орынбасары Мақсат Садығұлов. Біздің жолымыз болып, вокзалда билет алуға келген мүмкіндігі шектеулі жан Сивара Нұрматоваға жолығып қалдық. –Мен бұған дейін билет алуға туыстарымды жіберетінмін. Ал вокзалда болып жатқан осындай жаңалықтарды естіген соң өзім арнайы келіп, Алматы бағытына билет алдым. Бұрындары мүмкіндігі шектеулі азаматтар үшін вокзал аумағында жүріп-тұру қиын болатын. Қазір ол мәселе толық шешілген. Мен осында келіп, арнайы тетікті басқан кезде вокзал кезекшілері шығып, көмектесті. Арнайы бөлме де жасақталған екен. Біз үшін бұл бір қолайлы жағдай болды, – деп ризашылығын білдірген ол келешекте пойыздарда да мүмкіндігі шектеулі жолаушыларға қосымша орындар қарастырылса екен бір тілегін де жеткізді.

Қызмет көрсету пункті ашылды

Басқа да жаңалықтар

Қазақстан теміржолшысы газеті, №34-35 01 мамыр 2026 жыл