Корея жастары ҚТЖ-ға келді
«Қазақстан теміржолшысы» газетінің тілшісі
Компанияның ЖОО және арнайы кәсіптік білім беретін оқу орындарымен ынтымақтастық бойынша меморандумы аясында Оңтүстік Кореяның беделді Woosong University студенттері және оқытушылары ҚТЖ-ға келді. Адами ресурстарды басқару департаменті ұйымдастырған кездесуден соң шетелдік делегация өкілдері компания бас ғимаратын аралап, Астанадағы бірнеше теміржол нысандарына барды.
Аталған департаменттің HR-бизнес серіктесі Алма Сәулебаеваның айтуынша, ҚТЖ осындай 48 оқу орнымен келісімшарт жасасқан. Оның ішінде қазақстандық және шетелдік оқу орындары бар. Бұл жолы Кореяның Тэджон қаласындағы Вусонг университетінен келген қонақтарға елдің көлік саласындағы ҚТЖ-ның алатын орны мен мүмкіндіктері таныстырылды. Департамент өкілдері де өзара ынтымақтастықты одан әрі дамытып, компанияның түрлі оқыту бағдарламалары мен жобалары аясында үздік нәтиже көрсеткен теміржолшыларды сол оқу орнына жіберіп, білім алуы мен тәжірибе жинақтауына мүмкіндік беруді жоспарлауда. Атап айтқанда, «Жастар кадрлық резерві» жобасы аясында үздік қызметкерлер іріктеліп алынбақ. Мұндай келісімшарт Германияның ЖОО-ларымен де жасалған.
– Осы компанияға келуіміздің басты мақсаты – Қазақстандағы теміржол саласының қазіргі жағдайымен студенттерімізді таныстыру. Көрген кездегі алған әсерім өте зор, ҚТЖ алып компания және болашағы да жарқын екені байқалады. ҚТЖ мен біздің университет арасындағы ынтымақтастық жоғары деңгейде және біз осы саланы дамытуға өз үлесімізді қосқымыз келеді. Қазірдің өзінде біздің университетте білім алып жатқан қазақстандық студенттер көп. Тек студенттер ғана емес, компания қызметкерлерін де шақырып, өзара тәжірибе алмасу бойынша жоба ұйымдастырғымыз келеді, – деді аталған ЖОО профессоры Yongwoo Kim.
Айта кетсек, аталған шетелдік ЖОО 1954 жылы құрылған. 2025 жылы оның филиалы Түркістан қаласында ашылды. Шетелдік студенттер бұл іссапар барысында ҚТЖ Орталық музейі мен Қысқы баққа, «Тальго» техникалық қызмет көрсету пунктіне, Теміржол көлігі персоналын дамыту және бағалау орталығына, Жол диагностикалау орталығына барып, Қазақстан теміржолының тарихымен де, бүгінгі ахуалымен де танысты.