Кәсіподақ қызметін сараптаған семинар

Елордада «Қазақстандық салалық теміржол көлігі қызметкерлерінің кәсіби одағы» ҚБ-ның ұйымдастыруымен бірлестіктің бастауыш ұйымдарының жетекшілеріне арналған оқыту семинары өтті. Екі күндік іс-шараға Кәсіподақ филиалдарының сарапшылары, Орталық Кеңес өкілдері және аппарат қызметкерлері қатысты.

Семинарды ашқан «Қазтеміржолкәсіп» ҚБ төрағасы Оразғали Ахметбаев заман талабына сай білімін одан әрі жетілдіру арқылы жұмыс беруші мен жұмысшы арасындағы мәселелерді шешуде білікті маманға айналу әрбір кәсіподақ қызметкерінің міндеті екенін жеткізді. Соған орай түрлі мәселе бойынша арнайы эксперттер шақырылып отырған бүгінгі басқосу тиімді де жемісті боларына сенім білдірді.

Семинардың алғашқы күнінде ҚР Кәсіподақ федерациясы еңбек қатынастары бойынша сарапшысы, Халықаралық Еңбек Ұйымы халықаралық оқу орталығының түлегі, кәсіподақ бойынша білім беруді үйлестірушілердің жаһандық желісінің мүшесі Ләззат Ержанова тренинг өткізді. Ол кәсіподақтар қызметінің құқықтық негізі, еңбек қатынастарын реттеудегі кәсіподақтың рөлі, кәсіподақ ұйымдарының жұмысын ұйымдастыру, еңбек даулары мен жанжалдарының туындау себептері туралы егжей-тегжейлі түсіндіріп, әр тақырыпты арнайы тапсырмалар, кейстер арқылы бекітіп отырды. Сонымен қатар семинарда ҚР Еңбек Кодексі, ҚР «Кәсіподақтары туралы» заңы да талқыланды.  

Семинар барысында жұмыс беруші мен жұмысшылар арасындағы кикілжіңнің алдын алу, шешу, ондай жағдайларды басқару, жанжалдардың шығу себептері, еңбек даулары мен жанжалдарының психологиялық жағы туралы кеңестер беріліп, заңдық тұрғыда ұсынымдар айтылды. Жекелеген оқиғалар бойынша талдау жүргізіліп, ол өзгелерге сабақ болуы ескертілді. Қазақстан бойынша 2022, 2023, 2024 жылдары жалақымен байланысты – 634, еңбек келісімшартының бұзылуы жөнінде – 75, өндірістік бағытта – 21 және басқа себептермен 3 мыңға жуық жанжал фактілері туындаған.  

Келесі бағыт – кәсіподақ жұмысындағы жасанды интеллект тақырыбына арналды. Ол туралы ҚР Кәсіподақтар Федерациясы цифрлық технологиялар департаментінің қызметкерлері дәріс өткізді. Сонымен қатар семинарда еңбек қорғау мен қауіпсіздік мәдениетін қалыптастырудағы кәсіподақтың рөлі де сөз болды. Ал семинардың екінші күні «Қазақстан теміржолшысы» газетінің бас редакторы Дина Мұздыбаева Кәсіподақтың БАҚ саласымен ақпараттық өзара іс-қимылы тақырыбында баяндама жасап, кәсіподақ жұмысын мерзімді баспасөз арқылы көпшілікке кеңінен таныстыру мақсатында ақпарат беруге қатысты пікір бөлісті. Ал теміржолшылар үшін кәсіподақ жұмысы туралы бейнероликтер әзірлеудегі ерекшеліктер туралы Медиаредакция редакторы Дариға Құрымбаева баяндама жасады.  

Сонымен қатар ұйымдастырушылық, әлеуметтік-экономикалық және заңдық кеңес беру тақырыптарында орталық аппарат қызметкерлері Назира Көшкімбаева, Қайрат Мұқанов, Алмагүл Еримова, Самат Төлтаев, тағы басқалар сөз алып, өз салаларына қатысты сұрақтарға жауап берді.  

– Өңірдегі кәсіподақтар жұмысы үшін өте пайдалы семинар болды. Айтылған кеңес, ұсыныс, ақпараттардың бәрі кәсіподақ жұмысын жандандырып, түйткілді мәселелер кездессе, оңай шешуге септік етері сөзсіз. Ұйымдастырушыларға алғыс айтамыз, – деді Семей жүк тасымалы бөлімшесі Өскемен-1 станциясы жол торабы кәсіподақ комитетінің төрағасы Берікхан Тлеужанов.  

Іс-шара соңында кәсіподақ өкілдеріне сертификаттар табысталды.