Ақтөбе теміржолшылары Мемлекеттік кеңесші мен жұртшылықтың қатысуымен конституциялық реформаны талқылады
Ақтөбеде алдағы республикалық референдумның ережелерін түсіндіру бойынша ауқымды кездесу өтті. Іс-шараның негізгі спикері Қазақстан Республикасының Мемлекеттік кеңесшісі Еран Қарин болды, деп хабарлайды Rail-news.kz.
Талқылауға «Әділ және прогрессивті Қазақстанның Халықтық Конституциясы үшін» жалпыұлттық коалициясының өкілдері, Дания Еспаева, Ерлан Сәрсембаев, Раушан Қажыбаева, облыс әкімі Асхат Шахаров, «ҚТЖ» ҰК» АҚ Басқарма төрағасы Талғат Алдыбергенов, сондай-ақ Ақтөбе теміржол бөлімшесі мен Ақтөбе рельс арқалық зауытының еңбек ұжымдары және басқалар қатысты.
Кездесудің басты тақырыбы мемлекет дамуының стратегиялық бағыты ретінде конституциялық реформалардың мазмұнын талқылау болды. Мемлекеттік кеңесші теміржол саласы қызметкерлерінің ұлттық экономиканың тұрақтылығын қамтамасыз етудегі маңызды рөлін атап өтті. Ол негізгі Заңның жаңартылған редакциясының жобасы мемлекеттік саясаттың әлеуметтік бағдарлануын күшейтетінін, еңбек құқықтарын қорғаудың қосымша кепілдіктерін бекітетінін және еңбек адамының мәртебесін арттыратынын алға тартты.
Қорытындылай келе, кездесуге қатысушылар Конституцияға ұсынылған өзгерістер мемлекеттің азаматтар алдындағы жауапкершілігін нығайтуға және елдің ұзақ мерзімді дамуы үшін берік құқықтық негіз құруға бағытталғанын атап өтті. Соңында «сұрақ-жауап» форматында ашық диалог болды.
