Дирекциядағы думан

Ұлыстың ұлы күніне орай «ҚТЖ» ҰК» АҚ «Біріктірілген жоспарлау дирекциясы» филиалы да кең дастархан жайып, Наурыз мейрамын атап өтті. Кең фойеге кілем төсеп, құрақ көрпе жайып, киіз үй атрибутын құрған филиал қызметкерлері тоғызқұмалақ, асық ойнап, күй тартып, ән салып, дүбірлі думан жасады.

Дирекцияның мерекелік думанына «ҚТЖ» ҰК» АҚ Басқарма төрағасының орынбасары Марат Шакенов бастаған компания басшылары келіп қатысты. Дирекцияның өткен жылғы жұмысына жоғары баға берген Марат Арапбекұлы теміржолдың стратегиялық жоспарлау қызметінде маңызы зор ұжымның алдағы еңбегіне сәттілік тіледі. Мекеменің HR бас менеджері Руслан Баспақтың айтуынша, қазіргі таңда дирекцияда 100 қызметкер жұмыс істейді.  

– Екі жыл бұрын құрылған біздің дирекцияның міндетіне қозғалыс кестесін, тасымалды жоспарлау, маркетинг қызметі кіреді. Яғни Қазақстан бойынша бүкіл пойыздардың қай уақытта қалай жүретінін біздің дирекция жоспарлайды. Дирекция 5 департаменттен тұрады: тиеу және түсіруді ұйымдастыру департаменті, жүк тасымалын маркетингілеу департаменті, қозғалыс кестесі және пойыздар құрастыруды жоспарлау департаменті, көрсеткіштерді өңдеу және мониторингілеу департаменті және эксплуатациялық жұмысты индикативті жоспарлау департаменттері бар. Ұжым өте білікті мамандардан, яғни теміржол саласындағы жоспарлаушылар, маркетологтар, кесте жасаушылардан құралған. Жұмыстан тыс кезде, Наурыз сияқты мерекелік іс-шараларда өнерлі де белсенді ұжымбыз, – дейді ол.  

Биылғы Наурызда аталған дирекция ҚТЖ бойынша «Берекелі шаңырақ» номинациясын жеңіп алды.