ҚТЖ және РЖД жіксіз цифрлық транзитті қалыптастырады және тасымалдау көлемін ұлғайтуда

I-ші Халықаралық көліктік-логистикалық форум аясында Санкт-Петербург қаласында «ҚТЖ» ҰК» АҚ Басқарма Төрағасы Талғат Алдыбергеновтың «РЖД» ААҚ Бас директоры – Басқарма төрағасы Олег Белозеровпен екіжақты кездесуі өтті, деп хабарлайды Rail-news.kz. 

Тараптар тасымалдаудың тұрақты оң серпінін атап өтті: 2026 жылғы екі айының қорытындысы бойынша Қазақстан мен Ресей арасындағы жүк тасымалдау көлемі 15,2 млн тоннаны құраса, бұл 2025 жылдың сәйкес кезеңінен 3,8% жоғары. Осылайша, өткен жылы тіркелген өсім биыл да сақталады.

Ынтымақтастықтың негізгі драйвері транзит болып қала беретіні бөлек атап өтілді. Соңғы 7 жылда Қазақстан аумағы арқылы Ресей мен Қытай арасындағы контейнерлік транзит 16 есеге – 33-тен 550 мың ЖФБ-ға дейін өсті.

Кездесу барысында мемлекетаралық түйісу пункттерін синхронды дамыту және цифрландыруды ілгерілету, соның ішінде жіксіз цифрлық транзитті қалыптастыру мәселелері қаралды. Осы бастамаларды іске асыру жеткізу мерзімдерін қысқартуға және жеткізілімдердің тұрақтылығын арттыруға мүмкіндік береді.

Бұдан басқа, «Жаһандық сауданың жаңа географиясы: құрлықтарды біріктіре отырып" пленарлық сессиясы аясында «ҚТЖ» ҰК» АҚ өндірістік процестер жөніндегі басқарушы директоры Бауыржан Орынбасаров ірі теміржол жобаларын іске асырудың негізгі нәтижелері мен жоспарларын, сондай-ақ трансшекаралық тасымалдарды дамыту перспективаларын ұсына отырып, халықаралық көлік дәліздерін интеграциялау және инфрақұрылымды синхронды дамыту тақырыбында баяндама жасады.