Тасымалданған жүктің жалпы көлемі 8%-ға артты

2026 жылғы қаңтар–наурыз айларының қорытындысы бойынша Қазақстан Республикасының көлік саласы негізгі көрсеткіштер бойынша тұрақты өсім көрсетуде. Нақты көлем индексі 112,8%-ды құрады. Көрсетілген қызметтер көлемі 2,9 трлн теңгеге жетті, бұл 2025 жылдың сәйкес кезеңіндегі көрсеткіштен (2,4 трлн теңге) асып түседі, деп хабарлайды Rail-news.kz Көлік министрлігіне сілтеме жасап.

Тасымалданған жүктің жалпы көлемі өткен жылдың қаңтар–наурыз айларымен салыстырғанда 8%-ға артып, 239,8 млн тоннаны құрады (222 млн тонна). Жолаушылар тасымалының көлемі 9,3%-ға өсіп, 483,7 млн адамға жетті. Ал 2025 жылдың осы кезеңінде бұл көрсеткіш 442,5 млн жолаушыны құраған болатын.

Теміржол саласында «Дарбаза – Мақтаарал» және «Мойынты – Қызылжар» жаңа желілерінің құрылысын аяқтау жоспарланған. Бұл желінің өткізу қабілетін арттырып, елдің транзиттік әлеуетін кеңейтуге мүмкіндік береді.

Сонымен қатар, 1800 бірлік жылжымалы құрамды жаңарту қарастырылған, оның ішінде: 236 локомотив, 1373 жүк вагоны және 191 жолаушылар вагоны бар.

Аталған шараларды іске асыру көлік саласының тұрақты өсуін қамтамасыз етуге және 2026 жылдың қорытындысы бойынша нақты көлем индексінің жоспарлы 110% деңгейіне қол жеткізуге мүмкіндік береді.