ҚТЖ және CRRC: Еуразиялық логистиканың болашағын айқындайтын технологиялық альянс
Астанадағы Темір жол ынтымақтастығы ұйымының мерейтойлық іс-шарасы аясында «ҚТЖ» ҰК» АҚ Басқарма төрағасының орынбасары Марат Шакеновтың Фэн Чженьдон мырза бастаған Qiqihar CRRC компаниясының басшылығымен жұмыс кездесуі өтті, деп хабарлайды Rail-news.kz.
Тараптар компаниялар арасындағы серіктестік 20 жылдан астам уақыт бойы табысты дамып келе жатқанын атап өтті. Ал өзара іс-қимылдың жаңа кезеңі 2023 жылдың қазан айында Бейжіңде стратегиялық әріптестікті тереңдету туралы негіздемелік келісімге қол қоюдан басталды.
Марат Шәкенов бұл қарым-қатынастың жоғары маңыздылығын атап өтіп, олардың ұзақ мерзімді сипатына сенім білдірді. Кездесу барысында тараптар контейнерлік тасымалдарға арналған екі деңгейлі фитингтік платформаларды ұйымдастыруды қоса алғанда, инновацияларды енгізуді талқылады, бұл тасымалданатын контейнерлер санын едәуір арттырады. Сондай-ақ жүк пойыздарының жүрдек қозғалысын дамыту талқыланды. Жүк жылжымалы құрамының желісін кеңейтуге және техниканың сенімділігін арттыру бойынша бірлескен ғылыми-зерттеу жұмыстарын жүргізуге ерекше назар аударылды.
Тараптардың айтуынша, озық технологияларды Қазақстанның темір жол желісіне интеграциялау екі елдің экономикасы үшін қуатты синергетикалық әсер жасайды. Бұл стратегиялық көпірді нығайту өңірдің инвестициялық тартымдылығын арттырады және Қазақстанның үздіксіз жаһандық сауданы қамтамасыз ететін негізгі логистикалық хаб ретіндегі мәртебесін бекіте отырып, «Шығыс – Батыс» бағдарындағы тауар айналымының өсуіне тікелей ықпал етеді.