«ҚТЖ» мен Вьетнам теміржолы жүк тасымалын арттыру мәселесін талқылады
«ҚТЖ» ҰК» АҚ Басқарма Төрағасы Талғат Алдыбергеновтың «Вьетнам темір жолы» МК Бас директоры Хоанг Зя Кханмен кездесуі өтті, деп хабарлайды Rail-news.kz.
Тараптар жүк тасымалы көлемін одан әрі ұлғайтуды қоса алғанда, теміржол саласындағы екіжақты ынтымақтастықты кеңейту перспективаларын талқылады.
Былтыр Қазақстан Вьетнамға 15 мың тоннадан астам бидай экспорттағаны атап өтілді. Астық жүктері Хайфон портына (Вьетнам) Достық және Алтынкөл шекаралық өткелдері арқылы жеткізілді.
Құрамдар Ақмола облысының Азат, Ақкөл және Көкшетау станцияларынан жөнелтілді.
Қазіргі уақытта қазақстандық өнімді Вьетнамға жеткізу Хайфон портына шығатын Ляньюнган портынан теміржол-теңіз схемасын қоса алғанда, Қытай аумағы арқылы тұрақты мультимодальды маршруттар бойынша жүзеге асырылады.
Тараптар тасымалдау көлемін ұлғайтуға, жүк жөнелтушілер үшін қолайлы жағдайлар жасауға және көліктік-логистикалық ынтымақтастықты нығайтуға дайын екендіктерін растады.