ҚТЖ теңіз флотын құруда: алты кеме жасауға келісімшарттар жасалды
Мемлекет басшысының тапсырмасы аясында «Қазақстан темір жолы» ҰК» АҚ Транскаспий халықаралық көлік бағытын (ТХКБ) одан әрі дамыту үшін теңіз флотын құруға кірісті, деп хабарлайды Rail-news.kz.
KTZ Express-тың еншілес «KTZ Express Shipping» ЖШС компаниясы Jiangsu Haizhongzhou Shipping Industry Co., Ltd. компаниясымен және Баку кеме жасау зауытымен алты әмбебап жүк-контейнер тасымалдау кемесін салу туралы келісімшарттарға қол қойды.
Jiangsu Haizhongzhou Shipping Industry Co., Ltd. төрт кеме жасаса, Баку кеме жасау зауыты тағы екі кемені жасайды.
Жобаны іске асыру Қазақстанның ТХКБ-дағы ұстанымын нығайтуға және маршруттың тұрақты теңіз құрамдас бөлігін қалыптастыруға бағытталған.
Жоба Каспий және Қара теңіз бағыттарында жұмыс істеуге бейімделген, жүк көтергіштігі 9 900 тоннаға дейін және сыйымдылығы 537 ЖФБ-ға дейінгі «өзен-теңіз» класты кемелерді салуды көздейді. Бұл теңіз сегментінің ТХКБ бірыңғай логистикалық тізбегіне тиімді интеграциялануын қамтамасыз етеді.
Кемелер халықаралық талаптар мен экологиялық стандарттарға, соның ішінде IMO және MARPOL нормаларына сәйкес заманауи басқару және навигация жүйелерімен жабдықталады. Классификациялық сүйемелдеуді Bureau Veritas қамтамасыз етеді.
Бұл кемелердің қауіпсіздігі, сенімділігі және экологиялық тазалығының жоғары деңгейін қамтамасыз етіп, оларды халықаралық маршруттарда тиімді пайдалануға мүмкіндік береді, сондай-ақ жаһандық жүк жөнелтушілер тарапынан сенімді арттырады.