Адал еңбек алғысқа лайық

«ҚТЖ–Жүк тасымалы» ЖШС ұжымы локомотивтерді пайдалану департаменті ғимараттар мен құрылыстарды күтіп ұстау тобының менеджері Жамбалина Сәуле Ғазизжанқызын құрметті зейнет демалысына шығарып салды. Салтанатты рәсімде әріптестері тәжірибелі маманға құрмет көрсетіп, көп жылдық қызметіне алғыс білдірді.

Сәуле Ғазизжанқызы қырық жылдан астам еңбек жолының 20 жылдан аса уақытын теміржол саласына арнады. Экономист және жол қатынасы инженері мамандықтарының иесі тек білімі ғана емес, жұмысқа деген табандылығы, еңбекқорлығының арқасында өз ісін жетік меңгеріп, әріптестері арасында жоғары беделге ие болды. Қостанай өңірінде туған кейіпкеріміз алғаш саладағы қадамын өз өлкесіндегі теміржолда бастап, жүк тасымалы процесінде жоспарлау экономикалық сектордың инженері қызметін атқарды.  

Астанаға ауысқан соң ҚТЖ-дағы қызметі кіреберіс жолдар бөлімінің жетекші инженерінен бастап, өндірістік бөлімнің бастығы, маркетинг бөлімі бастығының орынбасары, Магистральдық желі дирекциясындағы түрлі бөлімдерде бас маман, негізгі қор мен техникалық басқару бойынша күрделі жөндеу бөлімі бастығының орынбасары, өндірісті қамтамасыз ету бойынша сарапшы қызметтерін атқарды. Сонымен қатар Тасымалдау процесі дирекциясында бөлімнің бас маманы, менеджер, қазіргі серіктестікте 1,2 деңгейлі және 15, 16 грейд менеджері болып еңбек етті.  

– Ұжым атынан сізге көп жылғы адал еңбегіңіз, жоғары кәсібилігіңіз және жауапкершілігіңіз үшін шынайы алғысымды білдіремін. Сіз қызмет жолыңызда компания қызметкерлері үшін қолайлы әрі қауіпсіз еңбек жағдайын қамтамасыз етуге зор үлес қостыңыз. Жауапкершілігіңіз бен жұмысқа деген жанашырлығыңыз арқылы әріптестеріңіздің құрметіне бөленіп, ұжымның зор сеніміне ие болдыңыз. Өміріңіздің жаңа кезеңі қуанышты, бақытты сәттерге тола берсін, – деді серіктестік басшысы Асан Үмбетов.  

Бұл мерейлі күнді әріптестері Сәуле Ғазизжанқызына мықты денсаулық пен бақыт тілеп, құшағын гүлге толтырып, үстіне сәнді шапан кигізді. Салаға сіңірген еңбегі үшін ол «ҚТЖ» ҰК» АҚ басқарма төрағасының Құрмет грамотасымен, «Кәсібі бойынша үздік» төсбелгісімен, «Теміржол саласында 20 жыл мінсіз қызметі үшін» төсбелгісімен марапатталған. Салтанатты жиында серіктестік директоры оны «Достық-Мойынты» медалімен марапаттады.