ҚТЖ басшылығы Шанхайда бірқатар екіжақты кездесу өткізді
Шанхай қаласында «Қазақстан – Қытай: көлік-логистикалық ынтымақтастық және электрондық коммерция – жаңа технологиялар, жаңа мүмкіндіктер» атты халықаралық бизнес-форум өтті, деп хабарлайды Rail-news.kz.
Іс-шараны «Қазақстан темір жолы» ҰК» АҚ ұйымдастырды. Форум жұмысына «Самұрық-Қазына» АҚ Басқарма төрағасы Нұрлан Жақыпов, Қазақстан Республикасы Президенті Әкімшілігі Басшысының орынбасары Әсел Жанасова, Қазақстан Республикасы Президентінің цифрландыру мәселелері жөніндегі көмекшісі Қуанышбек Есекеев және басқа да қатысушылар ат салысты.
Бизнес-форум аясында «Қазақстан темір жолы» ҰК» АҚ басшылығы Қытайдың ірі көлік-логистикалық және технологиялық компанияларының басшыларымен бірқатар екіжақты кездесу өткізді. Кездесулерге Қытайдың жетекші компаниялары – COSCO Shipping, Shanghai International Port Group, Ляньюньган порты, China Railway Container Transport, China Harbour Engineering Company, Global DTC және Sichuan Port and Shipping Investment Group қатысты.
Кездесулер барысында Транскаспий халықаралық көлік бағытын (Орта дәлізді) одан әрі дамыту, тасымал көлемін ұлғайту, бірлескен инфрақұрылымдық және логистикалық жобаларды іске асыру, көлік үдерістерін цифрландыру, жасанды интеллект технологияларын енгізу және инвестициялық ынтымақтастықты кеңейту мәселелері талқыланды.
«Бүгінде көлік бағыттарының бәсекеге қабілеттілігі тек инфрақұрылымға ғана байланысты емес. Деректер, цифрлық платформалар мен жасанды интеллект тасымалдардың тиімділігін арттырудың, шешім қабылдау жылдамдығын жеделдетудің және логистикалық сервистердің сапасын көтерудің негізгі факторларына айналуда», – деп бизнес-форумда сөйлеген сөзінде «Самұрық-Қазына» АҚ Басқарма төрағасы Нұрлан Жақыпов атап өтті.
Өткізілген кездесулердің қорытындысы бойынша тараптар стратегиялық көлік-логистикалық ынтымақтастықты кеңейтуге, бірлескен инфрақұрылымдық жобаларды іске асыруға және заманауи цифрлық технологияларды енгізуге өзара мүдделі екендіктерін растады.
Қытайлық серіктестермен ынтымақтастықты дамыту Қазақстанның Еуразиядағы негізгі транзиттік хаб ретіндегі рөлін нығайтуға және Транскаспий халықаралық көлік бағытының бәсекеге қабілеттілігін арттыруға ықпал етеді.