«Нұрлы жол» вокзалында санитарлық үй-жайлар жаңартылуда
«Нұрлы жол» теміржол вокзалында санитарлық үй-жайларды кезең-кезеңімен жаңарту жалғасуда, деп хабарлайды Rail-news.kz.
2026 жылдың басынан бастап санитарлық үй-жайларды (дәретхана бөлмелерін) жаңғырту жобасы әзірленді. Мамыр айында вокзалдың ең көп жолаушылар ағыны байқалған бірінші, төртінші және бесінші қабаттарында орналасқан алты бөлмеге кезең-кезеңімен жөндеу жұмыстары басталды.
4-ші қабаттағы бірінші жаңартылған санитарлық бөлме келушілер үшін ашық. Ағымдағы жылдың соңына дейін тағы екі үй-жайға жөндеуді аяқтау жоспарлануда, қалған үшеуі 2027 жылдың бірінші жартыжылдығында пайдалануға беріледі.
Жаңартылған бөлмелерде заманауи және практикалық материалдар қолданылады, әрлеу толығымен жаңартылады, сыртқы түрі жақсарады және жолаушылар үшін қолайлы жағдайлар жасалады.
Жұмыстарды вокзал әкімшілігі жолаушыларға қызмет көрсету сапасын арттыру шеңберінде коммерциялық алаңдарды басқару жөніндегі компаниямен бірлесіп жүргізуде.
2017 жылы пайдалануға берілген «Нұрлы жол» вокзалы елорданың ірі теміржол вокзал кешені және көпфункционалды қоғамдық кеңістік болып табылады. Теміржол көлігінің жолаушыларына қызмет көрсетуден басқа, мамандандырылған ХҚКО, көші-қон қызметі, полиция бөлімшелері, мұражай және басқа ұйымдар орналасқан. Күн сайын кешенге 9 мыңға жуық пойыз жолаушысы, сондай-ақ елорданың мыңдаған тұрғындары мен қонақтары келеді.
Вокзал әкімшілігі келушілерді вокзал кешенінің мүлкіне ұқыпты қарауға және барлығына қолайлы жағдайлар сақталуы үшін тазалықты ұстануға шақырады.