Жыл басынан бері пойыздардың 44 әйнегі сынған
Теміржол немқұрайлылықты кешірмейді. Жасөспірімдерге жай ғана ермек болып көрінетін әрекет санаулы секунд ішінде жарақат алуға, техниканың бүлінуіне, тіпті қайғылы жағдайға әкелуі мүмкін, деп хабарлайды Rail-news.kz.
Көліктегі полиция департаментінің қызметкерлері теміржол нысандарындағы қауіпсіздікті қамтамасыз ету мақсатында профилактикалық рейдтер мен жедел іс-шараларды тұрақты түрде өткізіп келеді. Әсіресе каникул кезінде ересектердің қарауынсыз теміржол маңында жүретін кәмелетке толмағандарға ерекше назар аударылады.
«Жыл басынан бері пойыздардың терезелерін сындыруға қатысты 44 дерек тіркелген. Мұндай оқиғалардың басым бөлігі Алматы, Шымкент, Қарағанды және Шу станцияларының учаскелерінде орын алған. Анықталған жағдайлардың көпшілігіне кәмелетке толмағандардың қатысы бар екені белгілі болды», - деп хабарлады Көліктегі полиция департаменті.
Жуырдағы оқиғалардың бірі Талас–Тараз аралығындағы теміржол учаскесінде болған. Белгісіз адам лақтырған тас электровоздың бүйір әйнегін сындырып. Жүргізілген жедел-іздестіру іс-шараларының нәтижесінде Тараз станциясындағы көліктегі полиция бөлімінің қызметкерлері құқық бұзушыны анықтады. Ол 19 жастағы қала тұрғыны болып шықты. Құқықбұзушы бөтеннің мүлкін қасақана бүлдіргені үшін жауапкершілікке тартылды. Сот шешімімен оған 50 АЕК мөлшерінде әкімшілік айыппұл салынды.
Көліктегі ПД ескертеді: қозғалыстағы пойыздарға тас және кез келген басқа да заттарды лақтыруға қатаң тыйым салынады. Бұл машинистер мен жолаушылардың өмірі мен денсаулығына қауіп төндіреді, сондай-ақ құқық бұзушының өзі үшін де ауыр зардаптарға әкелуі мүмкін.
Көлік полицейлері ата-аналарды балалардың бос уақытын бақылаусыз қалдырмай, теміржол маңында ойнаудың қаншалықты қауіпті екенін алдын ала түсіндіруге шақырады.