Ұстанымы – жауапкершілік және сауаттылық

Жаңалықтар

28.11.2017, 19:39

Қызылорда ЖТ бөлімшесінің персоналды басқару бөлімінде әлеуметтік мәселелер және еңбек қатынастары инспекторы болып еңбек ететін Шәмшагүл Алпысбаеваның өмірлік ұстанымы осы – жауапкершілік һәм сауаттылық. Теміржолшылар арасында «кадр бөлімі» аталып кеткен қазіргі персоналды басқару бөліміне бас сұқсаңыз, бейне бір семинар сабақ өткізіп жатқандай, біреулерге жаңадан келген құжаттардың жайын түсіндіріп, екіншісіне қандай да бір жеңілдік алуға құқығын түсіндіріп, тағы біреуіне қағаз бен қалам беріп өтініш жаздырып жататын Шәмшагүлді көресіз. Жиырма жылдан астам уақыт бір орында жұмыс жасап келе жатқан тәжірибелі маманның білмейтіні жоқ, сондықтан ананың жайы қандай болады, мынаны қалай істейміз деп, әлеуметттік-құқықтық мәселемен Шәмшагүлге теміржолшылар жиі келеді. –Кадр жұмысы өте мазасыз да тынымсыз. Бүкіл аймақ теміржолшылары, шалғайдағы станциялардан ат терлетіп дегендей түрлі мәселелермен келіп жатады, ертеңнен кешке дейін бір босамаймыз. Бірі демалыс орнына жолдама сұраса, бірі бала тууға байланысты құжат рәсімдейді, бірі жәрдемақы туралайды дегендей. Осындай жұмыста Ұлттық компания тарапынан жаңадан келген құжаттарды, заңнамалық ереже, актілерді дер уақытында игеріп әріптестерінің құжат айналымы жұмысына көмек көрсетіп, үнемі ізденіс үстінде жүретін Шәмшагүл Алпысбаеваның еңбегін ерекше бағалаймын. Бөлімдегі мамандар арасында оның сол тәжірибесі де әріптестеріне үлгі. Ол кісі сол біліктілігінің нәтижесінде белгіленген уақытта өткізілетін мамандарды аттестациялау, кәсіби біліктілігін тексеру сынақтарынан мүдірмей өтетініне ешкім шек келтірмейді. Өз кәсіби міндетімен қатар бөлімшеде ұйымдастырылатын мәдени-көпшілік шараларына да белсене араласып теміржолшылардың жоғын жоқтап, барын түгелдеп жүретін жауапкершілігімен танылған маман, – дейді әріптесі жайында пікір білдірген бөлім басшысы Нұрлан Бимұратов. Теміржолшылардың сауалына тұщымды жауап беріп, қажетті құжаттарын уақытылы пәттелеп олардың рахметіне бөленген Шәмшагүл қашанда бөлімше басшылығының алғысын алып, марапат биігінен көрініп жүреді. Аймақ теміржолшыларының іс-қағаздарын ретке келтіру, тіпті өзінің жеке жұмысымен бас сұққан, кеңес сұраған теміржолшыларды да тыңдап, қолдан келгенше көмек көрсетіп, қамқорлық жасап жүретін осы бір өз ісіне адам, тірлігіне мығым әйелді бөлімшенің үлкен-кішісі бір кісідей сыйлайды, бір-біріне «Шәмшагүлге барсаңшы, оның білмейтіні жоқ, сол түсіндіреді, содан білесің...» деп жатқанының талай куәсі болдық. Облыстың Жалағаш ауданында 1962 жылы дүниеге келіп, еңбек жолын 1991 жылы Батыс Қазақстан теміржолына қарасты Қызылорда жол бөлімшесінің кадр бөлімінен бастаған екен. Қазіргі уақытта бөлімшенің персоналды басқару бөлімінде әлеуметтік және еңбек қатынастары инспекторы. Күнделікті мамандардың құжаттарын ретке келтірумен қатар жаңа өзгерістерімен келетін нұсқаулықтарды саралап реттеу, еңбек қатынастарына қатысты өзгерістерді іске асыру, мамандардың кезегімен біліктілігін арттырып, еңбек демалыстарына жіберіп, оралғандарын жұмысқа қосу секілді күнделікті толып жатқан іс қағаздарын даярлап, бір тынбайтын маман қашанда ізденіс үстінде. Өйткені, жауапкершілікпен қоса сауаттылық – кез келген маманның ең бірінші кәсіби қаруы екенін жақсы түсінеді.

Ұстанымы – жауапкершілік және сауаттылық

Басқа да жаңалықтар

«Қазақстан теміржолшысы» газеті, №100 26 қараша 2024 жыл