ҚТЖ: Жапониядан Қазақстанға химиялық өнімдердің алғашқы мультимодальды тасымалдауы ұйымдастырылды
«Қазақстан темір жолы» ҰК» АҚ еншілес компаниясы – KTZ Express Қазақстанның көлік-логистикалық жүйесіне жаңа азиялық бағыттарды қосу арқылы халықаралық тасымалдардың географиясын кеңейтуде. Компания Жапонияның Кобе портынан Алматыға химиялық өнімдері бар контейнерлерді алғашқы мультимодальды тасымалдауды ұйымдастырды, деп хабарлайды Rail-news.kz.
Жалпы ұзындығы шамамен 6000 км маршрут теңіз және теміржол учаскелерін қамтиды: Кобе портынан контейнерлер теңізбен Ляньюньганға (ҚХР) дейін шамамен 1620 км жүріп өтіп, онда кедендік ресімдеуден кейін жүк теміржолға беріледі және Алматыға дейін тағы 4400 км тасымалданады. Қытай мен Қазақстан шекарасында Алтынкөл өткізу пункті арқылы контейнерлер қазақстандық жолтабанның жылжымалы құрамына жүктеледі, содан кейін қозғалыс соңғы межелі пунктке дейін жалғасады.
Ляньюньган Шығыс Азиядағы KTZ Express көлік инфрақұрылымының негізгі буындарының бірі болып табылады. Портта 2014 жылы «Белдеу және жол» бастамасы аясында іске қосылған Қазақстан мен Қытайдың бірлескен терминалдық жобасы – «Ляньюньган қаласындағы Қазақстан – Қытай халықаралық логистикалық компаниясы» орналасқан. Осы торап арқылы қазақстандық жүк ағындары Қазақстанды, Қытайды және Шығыс Азия нарықтарын байланыстыратын халықаралық теңіз маршруттарына шыға алады.
Кобеден Алматыға баратын бағыт мұндай байланыстың әлеуетін тек Қытайдан келетін жүктер үшін ғана емес, сонымен қатар Тынық мұхиты аймағының басқа елдерін Қытай мен Қазақстан аумағы арқылы құрлық маршруттарына қосу үшін де пайдалануға болатындығын көрсетеді.