Тоқаев Қазақстанды Еуразияның көлік-логистикалық хабына айналдыру міндетін атады
Қазақстан Президенті Қасым-Жомарт Тоқаев Қытайдың «Синьхуа» агенттігіне берген сұхбатында еліміздің көлік-логистикалық әлеуетін дамыту стратегиялық басымдықтардың бірі екенін атап өтті, деп хабарлайды Rail-news.kz.
Мемлекет басшысының айтуынша, бүгінде Қытайдан Еуропаға бағытталған барлық құрлықтық транзиттік тасымалдың шамамен 85 пайызы Қазақстан аумағы арқылы өтеді. Ел бұл көрсеткішті одан әрі арттыруды көздеп отыр.
Президент Қазақстан мен Қытай Еуразияның жаңа көлік архитектурасын қалыптастырып жатқанын айтты. Бұл жұмыстың ауқымы жүк тасымалының көрсеткіштерінен де байқалады. 2025 жылдың қорытындысында екі ел арасындағы трансшекаралық теміржол тасымалының көлемі 35 млн тоннадан асты.
Теміржол инфрақұрылымын кеңейту бағытында да бірқатар ірі жоба жүзеге асырылып жатыр. Тоқаевтың айтуынша, Шанхайға жасаған сапары кезінде Достық – Алашанькоу бағытындағы екінші теміржол желісін салу жөніндегі үкіметаралық келісімге қол қойылды. Жаңа желі іске қосылғаннан кейін осы маңызды шекаралық өткелдің өткізу қабілеті екі есе артады.
Сонымен бірге Аягөз – Тачэн үшінші теміржолының құрылысы жүріп жатыр. Президент бұл желі қолданыстағы инфрақұрылымға түсетін жүктемені едәуір азайтып, қосымша 20 млн тонна жүк ағынын қамтамасыз ететінін мәлімдеді.
Мемлекет басшысы Транскаспий халықаралық көлік бағытының, яғни Орта дәліздің маңызына да тоқталды. Оның пікірінше, Қытай мен Еуропаны байланыстыратын бұл бағыттың бәсекеге қабілеттілігін арттыру үшін «ақылды кеденді» енгізу, құжат айналымын цифрландыру, ақпараттық жүйелерді синхрондау және шекаралық рәсімдерді автоматтандыру қажет.
Қазір Ляньюньгандағы бірлескен логистикалық терминал, «Қорғас – Шығыс қақпасы» құрғақ порты, Сиань мен Алматыдағы терминалдар және Ақтаудағы контейнерлік хаб біртұтас логистикалық желінің маңызды буындарына айналып отыр.
«Біз транзит экономикасынан көліктік өзара байланысты экономикаға көшуіміз керек», – деді Қасым-Жомарт Тоқаев.
Президенттің айтуынша, түпкі мақсат – Қазақстанды жүк тасымалымен ғана шектелмейтін, логистика, өңдеу, өндіріс, электронды сауда және заманауи сервистер қатар дамитын Еуразияның көлік-логистикалық хабына айналдыру.