Үйкелістен ұшқын шыққан…

Шиелі станциясында ұйымдастырылған өртке қарсы оқу-жаттығу шарасында төтенше жағдайдағы диспетчерлік ақпарат алмасу жетілдіріліп, авариялық құтқару қызметтері мен құрылымдарының өзара іс-әрекеттерін үйлестіру сынды басты тапсырмалар мүлтіксіз орындалды. Сценарий бойынша Шиелі станциясында орналасқан «MKS Company» ЖШС-не қарасты сутегі тотығы тиелген жүк вагонында сутегі тотығы құйылған ыдыстарды қаптаған темір торлардың үйкелуі әсерінен ұшқын шығып, өрт ошағы пайда болғанын солтүстік бақылау кезекшілері байқаған... Салдарынан шұғыл құзырлы органдарға хабар таратылып, барлық мүдделілер іс-әрекетке көшірілген. Оқиға орнын оқшаулауға Шиелі станциясындағы Желілік полиция бөлімі, «ӘТЖК» АҚ Қызылорда атқыштар командасының Шиелі атқыштар тобы сарбаздары мен құқық қорғау органдарының қоғамдық тәртіпті қорғау қызметі тартылып, сүзгі бекеті жұмысы мен зардап шеккендерді құтқару дәлізі ұйымдастырылды. Өрт сөндіру қызметі келем дегенше вагон пойыз құрамынан ажыратылып, станциядағы өрт ошағын жоюға Шиелі өрт сөндіру пойызының 14 қызметкері, «ӨСжАҚЖҚ» ММ-нің №9 ӨСБ-нің 2АЦ өрт сөндіру автокөлігі мен 12 қызметкер жұмылдырылды. Бір техника мен 4 өрт сөндіруші «жедел жәрдем» қызметін атқарып, алғашқы медициналық жәрдем көрсетті. Таңертеңгі сағат 11:00 минутта дабыл қағылып, жеке құрамдардың білігі мен тактикалық дайындығы сарапқа салынған сыннан сүрінбей өткен өрт сөндірушілер арада жарты сағат өткенде, өрт шыққан вагонды жылжымалы құрамнан оқшаулап, қолда бар техникамен жеке құрамның іс бірлігі арқасында 11:30 минутта өрт жалынын өшірді. –Шиелі өрт сөндіру пойызы ұжымының бүгінгі кестеге сәйкес өткізілген шарада жеке құрамның кез-келген тосыннан болуы мүмкін кедергіге дайындығы пысықталды. Біздің өрт сөндірушілер жергілікті құзырлы орган қызметкерлерімен ұжымдаса қимылдып, бар-жоғы жарты сағат ішінде өртті ауыздықтап, тапсырманы ойдағыдай орындап шықты, – дейді өрт ошағында өздеріне тиісті міндеттерін атқарып, өрт сөндіру құралдарын жинастырып жүрген, өртпен алысқан сарбаздарының қимылын бағалаған НОРП-30 Шиелі өрт сөндіру пойызының басшысы Арнауыт Садық.

Азамат ҚҰЛЫМБЕТ, Шиелі