Сервис сұранысқа сай болсын...

Жаңалықтар

10.01.2018, 15:25

Атырауға іссапармен келген Парламент Мәжілісінің депутаттары Бақытжан Ертаев пен Ирина Унжакова жұртшылықпен, жергілікті мәслихат депутаттарымен кездесіп, өңірдің бірқатар стратегиялық нысандарымен танысты. Мәжіліс депутаттарының назарынан Атырау вокзалы да қалыс қалмады. Аймақтың бас қақпасында халық қалаулыларын «ҚТЖ-ЖТ» АҚ филиалы Атырау бөлімшесінің директоры Бөріхан Беркімбаев пен магистралдық желі бөлімшесі басшысы Елеубай Сапаров, Атырау вокзалының бастығы Айгүл Сайынқызы бастаған теміржолшылар қарсы алды. Теміржол вокзалдарының қызметін ұйымдастырудағы электронды кезек алу мен билет алу, жолаушыларды, қол жүктерді және багаждарды тексеру жүйесі, вокзалдағы ана мен бала бөлмесі, асхана мен өзге де халыққа қол жетімді қызметтермен танысқан халық қалаулылары ең бастысы – сервистің талапқа сай болғаны маңызды екенін жеткізді. Вокзалдағы билет кассасына кезекке тұрып, жолаушыларды тексеру жүйесінен өткен Халық қаһарманы Б.Ертаев пен И.Унжаковалар вокзалда жолаушылар пойызы бағытын үш тілде хабарлаған вокзал кезекшісі, диктор Айгүл Қамиеваның, жолаушыларды тексеру жүйесінің инспекторы Ақмарал Қаражанова мен электронды кезек пен билетті алу жүйесін тұрғындарға мұқият түсіндіріп, қызмет көрсеткен Гүлнәр Құлжановалардың қызметтеріне ризашылықтарын білдірді. Бірер жыл бұрын күрделі жөндеуден өтіп, іші мен сырты көзтартарлық күйге енген вокзалдың перронына дейін аралап көрген депутаттар акт залында теміржолшылармен жүздесіп, оларды толғандырған сұрақтарға жауап берді. Б.Ертаев бүгінгідей бақытты заманда өмір сүріп жатқан қазақстандықтар осы бақытты бағалап, ұлттың ұлы мен қызын тәрбиелеуде осалдыққа жол бермей, ел экономикасы мен әлеуетін арттыруда аянбай еңбек ету керек дей келе, ел болашағы жастардан үлкен үміт күтетінін жеткізді. Ал депутат И.Унжакова: «Теміржол саласында темірдей тәртіп барына көз жеткіздік. Бұдан өзге теміржолшылардың династиясы тұрақты өсіп, осы салада кәсіби шыңдалған мамандардың жұмыс істеп жүргені қуантады. Вокзалдағы әр қызметтің маңайында өз кәсібінің мамандары отырғанына куә болдық. Электронды жүйені халық жақсы пайдаланып, үйреніп жатқанын көрдік. Біздерге заң жобасына қатысты халықтың тарапынан көптеген сындар айтылады. Сол сындарға жауап беріп, өңірдің өзекті мәселелерін ескеріп жүруге келдік. Бүгінде еліміздің экономикасына теміржол саласының сүбелі үлес қосып отырғаны сөзсіз. Алайда, біз өркениетті елдердің деңгейіне жетуіміз үшін жолаушы сервисімен қатар жүк тасымалын да жаңа деңгейге көтеріп логистиканы дамытып, цифрлық жүйенің теміржолда кең қолданысқа ие болуына, тасымал көлемін арттыруға жұмыстануымыз қажет. Бұл бағытта ҚТЖ орасан зор жұмыс жасап жатқанын да білеміз», – деді. Жиын соңында аймақ теміржолының басшысы Бөріхан Беркімбаев іссапар барысында теміржол саласына да көңіл бөліп, теміржолшылармен кездескен халық қалаулыларына алғыс айтты, теміржолшылар ғасырлық үрдісті үзбей, ел экономикасын дамытуда еңбек ете беретінін жеткізді.

Сервис сұранысқа сай болсын...

Басқа да жаңалықтар