Жолшылар жұмыс жанданды

Аягөз жол дистанциясында жол шаруашылығы бойынша өндірістік қауіпсіздік және еңбекті қорғау саласындағы жетістіктер қатарын баса айтуға болады. Бүгінде жол дистанциясында еңбек ететін 337 адам үшін жұмысқа қолайлы барлық жағдай жасалған деп сеніммен айтуға болады. Жұмысшылар  арасында еңбек қауіпсіздігін нығайту және санитарлық-сауықтыру, т.б. шараларын іске асыру бағытындағы жұмыстар айтарлықтай нәтижелі жүзеге асырылып келеді. Мәселен, аталмыш мақсатта биылғы жылдық жоспар 5 млн 815 мың теңгені құраған болатын. Бұл бұрынғы жылдармен салыстырғанда анағұрлым мол сома. Қазіргі таңда бұл бағыттағы жұмыстар әр ай сайын нақты көрсеткіштер бойынша мерзімінде орындалуда. Дәл бүгінге дейін 298 мың теңге еңбеккерлер игілігі жолында игеріліпті. Бір сөзбен айтқанда, жаздың аптабы мен қыстың аязында да желі бойынан табылатын жолшылар үшін барынша жағдай жасалған. Олардың арасында әйел адамдар жоқ. Жалпы, бұл мекеме бойынша залалды жұмыстармен шұғылданатындар санатында 36 адам бар екен. Арнайы тәртіп бойынша мекемеге олардың барлығын сүтпен қамту, қажетті қызметтік киімдер беру ісі міндеттелген болатын. Бұл тарапта да жоспар үдесіне сай жұмыстар жасалынуда. Аягөз жол дистанциясының еңбекті қорғау инженері Еркін Кенжеғұловтың айтуынша, ағымдағы жылдың басынан бергі көрсеткіштер бойынша өндірістік жарақат алу оқиғалары тіркелмеген. Осының өзі дистанцияда жазатайым оқиғалардың алдын алу шаралары мен техникалық дәрістердің нәтижелі жүргізілгенін айғақтаса керек. –Желі бойындағы околодкалардың барлығында да дерлік еңбекті қорғау бұрыштары әзірленді. Сонымен қатар, жол шаруашылығындағы еңбеккерлер игілігі үшін жаңадан қоғамдық моншалар салынды. Ал бұрыннан жұмыс істеп келе жатқан моншаларға қазіргі күннің өзінде толықтай жөндеу жұмыстары жүргізілді, – дейді еңбекті қорғау инженері Еркін Кенжеғұлов.   Қуаныш ҚОЖАЕВ, Аягөз