Мәскеуден марапат алған Майра

Жаңалықтар

06.03.2018, 15:32

Өрімдей қыз кезінде жол жөндеуші болып жұмысқа кірген Майра атақты жол шеберінің қызы еді. Сондықтан оның жұмысына күмән келтірген, «осы қыз бала-ау, жұмысты жасай алмас» деген жан болмапты... Содан бері, мінекей, 40 жыл уақыт өтіпті. 1978 жылы Ганюшкино жол дистанциясына қарасты Бақсай-Аққыстау жол учаскесінде еңбек жолын бастаған Майра жол жөндеушіден бригадир, биргадирден жол шебері дәрежесіне дейін өсті. 1982 жылы Мәскеу қаласында өткен кәсіподақтар съезіне қатысып, «Құрметті теміржолшы» төсбелгісімен марапатталғаны – өміріндегі ең қуанышты да мерейлі сәті. Темір жолдың өз қиындығы бар десек, оның ішінде жол шаруашылығының шаруасы шаш етектен. Уақытпен, ауа-райымен, жылдың қыс не жаз мезгілімен санаспай жұмыс жасау, жолдың бүтіндігін қадағалап, пойыздардың қауіпсіз жүрісін қамтамасыз ету – айтуға оңай. Әр шпалдың орнықтылығы, бұранданың беріктігі, миллиметрге дейінгі дәлдік маңызды жерде босаңсуға жол жоқ. Енді ше, мыңдаған жолаушы мен тонналаған жүктің тағдыры жолдың бүтіндігі, яғни сенің қолыңда екенін сезінесің. – Ер азаматтарға қайта жеңілдеу, жұмыстан келгесін демалады. Ал біз әйелдер ше, үйге келген соң аналық, әйелдік міндетіңе кірісесің, балаларға қарап, отбасыңа тамақ дайындап, басқа да толып жатқан ұсақ-түйек үй шаруасымен айналысасың. Осындай өмір жолдарынан өтіп, зейнеткерлік жасқа да жақындадық. Жолдасым Мейрамбай да, екі балам – Әділбек пен Алтынбек те бүгінде осы жол шаруашылығында еңбек етеді. Яғни, теміржолшылар династиясын жалғастырып келеміз,– деген Майра бүгінде ҚТЖ компаниясының әйелдерді ауыр жұмыстан алыстатуға байланысты арнайы бағдарламасына орай соңғы жылдары кеңсе жұмысына ауысқанын да айтып өтті. Әйелдер мерекесі қарсаңында Майра Жұмалиева теміржолда тер төгіп жүрген барша қыз-келіншектерді, апалары мен құрбыларын, сіңлілері мен қыздарын төл мерекемен құттықтап, ең алдымен мықты денсаулық отбастарына амандық тіледі.

Мәскеуден марапат алған Майра

Басқа да жаңалықтар

Қазақстан теміржолшысы газеті, №51 04 шілде 2025 жыл