Жалтырлық жауқазын

Жаңалықтар

06.03.2018, 15:42

Оқуға 2 мин

Жалтыр станциясында дүниеге келген Лаура есі кіргеннен анасының етегіне жабысып, Қарадыр станциясында балалық шағын өткізеді. Түтінін будақтатқан отарбаларға қарап отырып, ойы шартарапты шарлайтын бүлдіршін қыз күндердің күнінде тағдыры теміржолмен тоғысатынын сезген де шығар... Сондықтан «Шешеге қарап қыз өсер» демекші, теміржолшы анасына қарап бойжеткен Лаура болашақ мамандығын таңдайтын сәтте де ойланбастан Алматыға барып, М.Тынышпаев атындағы көлік академиясына оқуға түсті. Лаура Өтебайқызы жоғары оқу орнын да ойдағыдай аяқтайды. Төрт жылдан соң табақтай дипломын құшақтаған жас маман туған жері – Жалтырға бет алады. Өзін енді студент жас емес, салиқалы маман сезінді. «Мен енді Лаура емес – Лаура Өтебайқызымын» деді анасына мақтанып дипломын көрсетіп жатып. Бүгінде сол күндерді күліп отырып еске алады. Теміржолшы маман болып өзіңді мойындату тіпті де оңай емес екенін осы өткен жеті жылда жақсы түсінді. Станция басшылығы туған жерде қызмет еткісі келген жас маманға лайықты жұмыс беріп, барынша қолдау көрсетті, әрине. Бүгінде тауар кассирі Лаура Карашина басшылықтың сенімін ақтаған сыңайлы. Жұмысына байланысты сын емес үнемі мақтау естиді. – Ауысыммен жұмыс жасаймын. Тауар кассирі жұмысының да жауапкершілігі жетерлік. Сондықтан ең бастысы қателеспеуге тырысамын, жалпы жұмыс қызық, көңілді, өзіме ұнайды. Соңғы кезде Жалтырда да жастар көбейіп жатқаны қуантады, – деген Лаураның ендігі мақсаты – көңіліндегі азаматты кездестіріп, отбасын құру. Болашақ жарының теміржолшы болғанын қалайтынын да жасырмады.

Жалтырлық жауқазын

Басқа да жаңалықтар

Қазір оқылуда

Қазақстан теміржолшысы газеті, №81 13 қазан 2026 жыл