Қазтеміртранс: төл мерекеге табыспен жетті

Жаңалықтар

05.08.2016, 10:46

Ел теміржолындағы реформалық өзгерістер «Қазтеміртранс» акционерлік қоғамын да айналып өтпеді. Компания алдында бүгінгі таңда жаңа міндеттер тұр. Сол міндеттерді жоғары деңгейде жүзеге асырып, жаңа мақсаттарға ұмтылған қоғам ұжымы биылғы кәсіби мерекелерін салтанатты жағдайда атап өтті. Мәжіліс залында бас қосқан сала мамандарын компания президенті Санжар Елубаев құттықтап, мерекеге табыспен жеткен ұжымның бірқатар қызметкерлерін Құрмет грамоталарымен марапаттады. –Алдымызда тұрған ең басты міндеттердің бірі – негізгі қызметті коммерциялау, нарықтың жаңа сегменттеріне шығу. Мен осы міндеттер үдесінен «Қазтеміртранс» АҚ ұжымының шыға алатынына сенімдімін. Осындай зор жауапкершілік арқалаған абыройлы қызмет иелері – әріптестерімді, барлық теміржолшылар қауымын бүгінгі төл мерекелерімен шын жүректен құттықтап, баршаңызға мықты денсаулық, өмірде сәттілік және еңбектеріңізге табыстар тілеймін! – деді компания басшысы. Компания президентінің Құрмет грамотасымен қоғамның 23 теміржолшысы, Алғыс хатпен 20 маманы марапатталды. Олардың көбісі – компанияның еліміздің барлық аймақтарындағы филиалдарында еңбек ететін қарапайым жұмысшылар, мәселен, слесарьлар, жөндеу жөніндегі жұмысшылары, ауысым диспетчерлері, вагон паркін сақтау жөніндегі жол инспекторлары, тағы да басқа сол сияқты еңбек адамдары. Сондай-ақ, «ҚТЖ» ҰК» АҚ президенті Асқар маминнің Құрмет грамотасымен 3 адам, Алғыс хатымен 3 адам, тағы үш қызметкер «Адал еңбегі үшін», «Үздік маман» және «Кәсібі бойынша үздік» төсбелгілерімен марапатталды. Ал саланың ең мәртебелі жоғары атағы «Құрметті теміржолшы» белгісімен Вагон операторының қызмет көрсету дирекциясы филиалының директоры Күмісбек Матжанов марапатталды. Болат жолда 22 жыл еңбек еткен теміржолшы соның 18 жылында басшылық қызметтерді атқарып келеді. Мерекелік шара соңы елімізге танымал өнер жұлдыздарының концерті және сала тақырыбына сай ұйымдастырылған викториналық ойындарға ұласты. Теміржолдағы түрлі мамандық иелерін жасырылған суреттер арқылы оңай тауып берген мереке иелеріне ынталандыру сыйлықтары берілді. Ұжым қызметкерлеріне арнап мерекелік дастархан жайылды. Еліміздегі жүк вагондары паркінің ірі операторы болып табылатын қоғам – «ҚТЖ» ҰК» АҚ-ның негізгі еншілес компаниясы саналады. Тасымал көлемі артқан сайын құрылғанына 13 жыл болған компанияның да жұмыс ауқымы жыл санап көбейіп келеді. 2007 жылы «Қазжелдортранс» атауынан бүгінгі атына өзгерген компания өмірінде әр жылда жаңа өзгерістер болып тұрады. Атап айтқанда, IP-телефония құру, мәліметтер таратудың корпоративтік желісін кеңейту, ҚТЖ инвентарлық паркі вагондарын «Қазтеміртранс» АҚ-на ауыстыру, КТТ қызметкерлері пәтерге қол жеткізу үшін әлеуметтік бағдарламаны жүзеге асыру сынды қыруар шаруалар атқарылды. Қазіргі таңда компанияның жеке паркіндегі вагондар саны 60 мыңға жетті. Қоғамда 2,5 мың адам еңбек етеді. Аймақтық желілері еліміздің барлық өңірінде ашылған. Бүгінгі «Қазтеміртранс» – бұл ірі көліктік және логистикалық кәсіпорындар, зауыт-өндірушілер, кен өндіруші компаниялар, шағын және орта кәсіпкерлік сынды ірі әріптестерімен ынтымақтаса қызмет ететін мықты әрі, бәсекеге қабілетті компания.

Қазтеміртранс: төл мерекеге табыспен жетті

Басқа да жаңалықтар

Қазақстан теміржолшысы газеті, №42 03 маусым 2025 жыл