Кәсіби міндетін кедергісіз атқарсын

Жаңалықтар

13.04.2018, 12:02

Оқуға 3 мин

Қызылорда магистральдық желі бөлімшесінің директоры Ибраким Басықараев бөлімшеге қарасты мекемелердің басшылары мен жауапты мамандарын жинап қозғалыс қауіпсіздігін сақтау шараларын арттыру мақсатында дөңгелек стол өткізді. Жиынды өткізудің негізгі себебі «ҚТЖ» ҰК» Магистральдық желі дирекциясы бойынша бөгде адамдардың, қараусыз малдың пойызға басылуы, жол бойында ұрлық-қарлық оқиғаларының өріс алуы және жолға бөгде заттың қойылып кету жағдайларының орын алуы салдарынан жылжымалы құрамдардың қозғалысына қауіптің артуына байланысты болып отыр. Бөлімше директоры Ибраким Басықараев өткен жылғы және жыл басынан бергі жағдайымен таныстырып, әріптестерін ынтымақпен жұмыс жасауға шақырды, теміржолшының негізгі жұмысы пойыздар қозғалысы қауіпсіздігін сақтау шараларына немқұрайлы қарамай, әр еңбеккердің кәсіби жауапкершілікпен жұмыс жасауын талап етті. Қазіргі таңда Қызылорда магистральдық желі бөлімшесінің пайдалану ұзындығы 1051,7 км, бұл Сексеуіл-Қоскөл телімін қоспағандағы өлшем. Осы аралықтағы 32 теміржол өткелінің тек біреуінен басқасы тәулік бойы күзетіледі. Бөлімше бойынша Қызылорда, Қазалы және Сексеуіл жол дистанциялары, Қазалы және Қызылорда белгі беру және байланыс дистанциялары, Қазалы, Қызылорда электрмен жабдықтау дистанциялары телімдерде жылжымалы құрамдардың қауіпсіз қозғалысы үшін жұмыс жасап келеді. – Өткен жылы Магистральдық желі дирекциясы бойынша 67 адам, 97 мал басу оқиғасы, 284 мәрте локомотив машинистерінің шұғыл тежегіш басуы орын алған. Оның ішінде біздің бөлімшеде 7 рет адам басу оқиғасы, Сексеуіл-Жезқазған жаңа телімінде 21 мәрте мал басу жағдайы, 27 рет тепловоз машинистерінің шұғыл тежегіш қолдану жағдайы тіркелді. Осыған байланысты «ҚТЖ» ҰК» Магистральдық желі дирекциясы, ҚР ІІМ Ішкі істер көлік департаменті 2018 жылдың қаңтар айында бекіткен теміржол магистралінің құнды материалдары ұрлануының, адам басу, мал басу, жолға бөгде зат қою фактілерінің алдын алу мақсатында бірлескен іс-шара жоспары негізінде бұған дейін жүргізіліп келген профилактикалық жұмыстар енді күшейтіліп, құзырлы органдармен бірлесе атқарылатын болады, – деді бөлімше басшысы. Бөлімше бойынша өткізілген профилактикалық шараларға тоқталсақ, станцияларда 2267 адам қатыстырылған жиын, 22032 оқушымен білім ошақтарында кездесу, 16791 рет мал иелері мен шаруа қожалықтарында түсіндіру жұмыстары, 171 мәрте ЖІІб өкілдерімен, 648 рет МАИ өкілдерімен біріккен рейд жүргізіліп, 16913 автокөлік жүргізушілеріне өткелден өту тәртібі түсіндіріліпті. 106 рет автокөлік иелерінің өткелден өту тәртібін бұзғандығы анықталып, МАИ басшылығына, ауыл, аудан әкімдіктеріне хат жолданған. 17 226 адамға қауіпсіздік қағидаттары жазылған парақшалар таратылып, 45 км жол бойына жаңадан қоршау тұрғызылған екен. Жиында сөз алған дистанция басшылары мекемелерде атқарылған жұмыстар есебін жариялап, өз ұсыныстарын білдіріп, күрмеулі мәселелерді талқыға салды. Мәселен, пойызға басылған малдың сырғасының болмауынан мал иесінің табылмай қалуы, металл сынықтарын қабылдайтын орындарға ескерту жасап, олармен ымыраласып жұмыс жасау нәтижесінде ұрыны құрықтау, тежегіш басылған орынды кеңінен, жан-жақты тексеру ұйымдастырып, себеп-салдарын анықтау және ең бастысы, жолшылардың теміржолшыға кәсіби міндетін кедергісіз атқаруға жағдай туындату, яғни автокөлік иесі болсын, мал иесі болсын ҚР Кодексінде белгіленген талапты сақтауын, яғни өткелден өту тәртібін, малды жолдан белгіленген қашықтықта жаю секілді әркім білуге тиіс қағидалардың қатаң сақталуы талап етілді. Дөңгелек үстел барысында айтылған жағымды жаңалықтың бірі адам басу оқиғасы жиі орын алатын, қала іргесінде Қызылорда-Белкөл перегонында алдағы күндерде көпір салу жұмысының басталатындығы болды. – Жергілікті әкімдікке жылдар бойы Қызылорда-Белкөл арасында жаяулар өткеліне көпір салыну қажеттігін айтып, ұсыныс хат жолдап келеміз. Соның нәтижесінде биыл салынатын көпірдің жобалық-сметалық құжаттары бекітіліп, құрылысы әне-міне қолға алынады деп күтілуде, – деді Ибраким Асқарұлы.

Кәсіби міндетін кедергісіз атқарсын

Басқа да жаңалықтар

Қазір оқылуда

Қазақстан теміржолшысы газеті, №81 13 қазан 2026 жыл