Ең бастысы – еңбек адамы

Жаңалықтар

27.04.2018, 11:16

"Самұрық-Қазына" АҚ компаниялары тобы құрылымын ықшамдау барынша білікті әрі байыпты түрде жүргізіледі. Бұл туралы 26 сәуір күні Астанада өткен XIII халықаралық НR-конференциясында айтылды. Таяуда "Самұрық-Қазына" қоры жаңа Даму стратегиясы мен Трансформация бағдарламасын бекіту барысында Елбасы Нұрсұлтан Назарбаев басқару деңгейлерін қысқарту керектігін нұсқағаны белгілі. Осылайша, Қор құрамына кіретін компаниялар саны 332-ден 179-ға дейін қысқартылып, басқару деңгейі күрделі 5-6 деңгейден 3-ке дейін азаймақ. Нәтижесінде «Самұрық-Қазына» Қорының басқару құрылымы ыңғайлы әрі ұтқыр күйге түспек. Ал жоғары оқу орындарын аяқтаған жас түлектерге қызметте өсіп, тәжірибе жинақтауға мүмкіндік беретін "Жас өркен" бағдарламасы одан әрі көкжиегін кеңейтпек. "ҚТЖ" ҰК" АҚ "Теміржол көлігі персоналын бағалау және дамыту орталығы" филиалының жетекшісі Марал Марасилов та HR-конференциядан көп нәрсе алғанын, теміржол саласында кадр қорына айрықша назар аударылатынын, осы мақсатта көптеген оқыту, жеке тұлғаның көшбасшылық қасиеттерін жетілдіру, біліктілікті көтеру іс-қимылдары жүргізілетінін әңгімеледі. Сонымен қатар, Әлеуметтік өзара ықпалдастық және коммуникация орталығы ұйымдастырған «Жаңа замандағы Қазақстан: Industrial relations» панельдік сессиясында да еңбек-әлеуметтік саладағы өзекті мәселелер қарастырылды. Шара барысында өндірістегі ішкі коммуникация мен еңбек қатынастарындағы соңғы жаңалықтар, өнеркәсіптік өзгерістер кезіндегі қажет дағдылар жайы талқыланды. Келелі кеңесті Әлеуметтік өзара ықпалдастық және коммуникация орталығының бас директоры, әлеуметтік ынтымақтастық және стратегиялық коммуникациялар жөніндегі сарапшы, психолог, іскерлік басқару маманы Ербол Исмаилов жүргізді. Шараның басты сөз тізгіндеушілері мемлекеттік мекемелер мен коммерциялық құрылымдардың стратегиялық сала басшылары, ҚР Кәсіподақтар федерациясы мен үкіметтік емес ұйымдар өкілдері, ғалымдар және «Самұрық-Қазына» қорының сарапшылары болды.

Ең бастысы – еңбек адамы

Басқа да жаңалықтар

Қазақстан теміржолшысы газеті, №56 24 шілде 2026 жыл