Алматы – Шу арасы қызу құрылыс...

Ағымдағы жылдың көктемінде «Нұрлы жол – болашаққа бастар жол» жаңа экономикалық саясаты аясында Алматы-1 – Шу бағытындағы темір жол телімінің екінші желісінің құрылысын жүргізу және электрлендіру басталды. Тоғыз жолдың торабына орналасқан Шу станциясынан 15 шақырым қашықтықтағы Кемер станциясынан бастау алған бұл құрылыс салаға жан бітірді. Жалпы Елбасының «Нұрлы жол» стратегиялық бағдарламасына сәйкес салынып жатқан Алматы – Шу темір жолының екінші желісінің құрылысы Қазақстан үшін маңызы зор жоба болмақ. Осы жоба аясында 110 шақырым жол төселіп, 16 станция жаңартылуда. Жүзден астам инженерлік құрылғы бой көтеруде.  Жолаушылар тасымалы мен жүк тасымалының көлемі артады. Пойыздар қозғалысы өсіп, оның қатарында жүк пойыздарының жылдамдығы бір жарым есеге артады. Құрылыс барысында 1400-ден астам адам жұмыспен қамтылса,  пайдалануға берілген соң да қосымша жаңа жұмыс орындары ашылады деп күтілуде. Сондай-ақ  Алматы – Шу учаскесіндегі екінші темір жол желісі құрылысының басталуы Жамбыл облысының да әлеуметтік-экономикалық бағытта өркендеуіне өз септігін тигізіп отыр. Өйткені, темір жол – ел экономикасының күретамыры. Кез келген мемлекеттің экономикалық даму үрдісін сөз еткенде, міндетті түрде жол мәселесі алға шығады. Елбасы барлық аймақ әуе, темір жол, тас жолмен өзара тығыз байланысуы керек деп айта келе, елдің әлеуметтік жағдайын жақсартуға бағытталған инфроқұрылымдық дамудың бірнеше бағытын ұсынды. Оның қатарында әуе және темір жол, автомобиль жолдарының инфроқұрылымын дамытуда бірқатар тапсырмалар берді. Осы тапсырмалар аясында салынып жатқан Алматы-Шу темір жолының екінші желісінің құрылысы өңірде темір жолдың даму тарихын ары қарай жалғастырмақ. Өйткені, бүгінде ел экономикасы дамып, темір жол тасымалына сұраныс өсті. Ал, темір жолдың осы учаскесінің өткізу қабілеті тәулігіне 24 пар жүк тасымалдау пойыздары көлеміне жетіп отырса, бұдан басқа 27 пар пойыз жолаушылар тасымалы. Соңғы кездері жолаушылар пойызының, әсіресе жүйрік пойыздар көлемінің артқанын ескерсек, темір жол саласына жүктелген міндеттердің қаншалықты жауапты екендігін ескеруге болады. Осы тұрғыда жаңадан екінші темір жолдың іске қосылуымен жүк тасымалдау көлемі үш есеге ұлғайып, жол жүру мерзімі екі есеге азаятыны қуантуда. Бұл стратегиялық маңызы зор жоба ел экономикасының сұранысын қанағаттандырумен қатар, жолаушыларға қызмет көрсету сапасын көтеруге, жол қауіпсіздігін нығайтуға мол мүмкіндіктер береді. Мұндай жол құрылыстары тек аймақаралық қатынастарда ғана емес, облыс экономикасының басқа да салаларын дамытуға үлкен мүмкіндік береді. Бүгінде темір жол халықтың бақуатты тірлігінің көзіне айналды. Жамбыл өңірінің темір жол өтетін аймақтарында 80 мың адам тірлік етсе, соның 12 мыңы темір жол саласында тұрақты жұмыспен қамтылған.

Ерман ӘБДИЕВ, Жамбыл