Су тасқынына дайындық

Қыстың көбі кетіп азы қалды. Жақындап қалған көктем мезгілінде болуы мүмкін апаттың бірі – су тасқыны. Осыған байланысты осы кезден елімізде су қоймаларының, бөгеттердің, қауіпті жол учаскелерінің және көпірлердің жай-күйін тексеру жұмыстары жүргізілуде.  

Соның ішінде Қазақстан темір жолына қарасты нысандар да бар. Пойыздар үздіксіз және қауіпсіз жүруі үшін «Қазақстан темір жолы» ұлттық компаниясы» АҚ 1 наурызға дейін оңтүстік өңірде, 15 наурызға дейін батыс және шығыс өңірлерде, ал 1 сәуірге дейін солтүстік аймақта қажетті материалдар мен конструкциялар тиелген 42 арнайы пойыз дайындайтын болады. Бұл туралы ҚР Үкіметінің су тасқыны кезеңіне дайындық туралы отырысында ҚР индустрия және инфрақұрылымдық даму министрі Жеңіс Қасымбек мәлімдеді.

         «Жолдар мен жасанды құрылғылардың қауіпсіздігін және тұрақты жұмыс істеуін қамтамасыз ету үшін техникалық шаралар әзірленеді және қауіпті жерлердің тізімі жасалып жатыр. Аумақтық ұйымдармен бірлесіп су қоймаларының, агротехникалық бөгеттердің жай-күйін тексеру, сондай-ақ күрделі жағдай туындаған кезде облыстық төтенше жағдайлар бөлімшелерімен өзара іс-қимыл жасау жұмыстары жүргізілуде», деді министр. Су тасқыны қаупі кезеңінің басталуына дейін көпірлердің, құбырлардың су жүретін жолдарын тазарту жұмыстары жоспарланған.

 Бұған қоса республикалық маңызы бар автомобиль жолдарын су тасқыны кезеңіне дайындау мақсатында іс-шаралар жоспары бекітілді. Уақытылы дайындықты ұйымдастыру үшін Іс-шаралар жоспарына сәйкес бүгінгі күні жол материалдары, яғни 254 мың тонна жанар-жағар май (60%), 6,8 мың м3 құм (47%), 2,1 мың м3 тас (75%), 9,5 мың м3 ұсақталған тас (68%) және темір бетонды конструкциялар қоры құрылды.

Нұрай СӘРСЕНҒАЛИ