Энергетикалық үнем – пойыз тартымында
Семей ЖТ бөлімшесі теміржолшылары үнем мен табысқа негізделген және экономикалық тиімділігі мол жаңашыл шараларға ден қоюда. Соның ішінде электр энергиясы мен жанар-жағармай шығынын азайту мәселесі биыл да тың қырынан қарастырылуда.
Бұл ретте бөлімше басшылығы мен аталмыш бағыт бойынша жауапты мамандар тарапынан пойыз тартымына жұмсалатын жанармай шығынын үнемдеу осыған дейін де қолға алынып, оң нәтижелер берген болатын. Мәселен, өткен жылғы көрсеткіш бойынша 120 млн-нан жоғары қаражаттың 529,3 тонна дизельді отыны үнемделініпті. Оған себеп көп, бірінші кезекте тепловоз паркі эксплуатациясын 1,43 бірлікке дейін төмендетіп, вагон айналымын тиімді қолдану оң нәтиже берген. Соның аясында өткен жылы тоннакилометрлік жұмыс 102,8 пайызға артық орындалыпты.
Ал, биыл бұл бағыттағы жұмыстар қаңтар айынан бастап қайтадан қолға алынды. Бөлімшенің өндірістік-техникалық бөлімі мамандарының айтуынша, ол үшін арнайы жоспар әзірленіп бекітілген. Осы орайда, биылғы меже бойынша пойыз тартымына жұмсалатын дизельдік отынды 481,2 тоннаға дейін, яғни, шамамен 110 млн теңгеге дейін үнемдеу жолға қойылып отыр. Ол үшін тиімділік әкелетін іс-шаралар, атап айтсақ, ауыр салмақты, ұзын жылжымалы құрамды пойыздарды құрастыру, тепловоздарды пайдалану паркінің жүк түріндегі қозғалысын азайту, станциялардағы негізгі және айналым уақытын төмендету сынды кешенді жұмыстар легі күтіп тұр.
Бүгінгі таңда осынау көрсеткіштер бойынша бөлімшеде арнайы мамандар іс барысын бастап кетті. Басты мақсат – пойыздар тартымына дизель отынын нақты тұтынуды азайту, үнемдеу арқылы шығынды азайта отырып жылдық қосымша кірісті еселеу негізгі меже саналуда.
Қуан Ертіс, Семей