Вокзал қызметкерлері курстан өтті
![](https://rail-news.kz/uploads/posts/2019/5/29/1559132096085.jpg)
Еліміздегі бірқатар вокзал қызметкерлері «ҚР кәсіпорындарында еңбек қауіпсіздігі және еңбекті қорғау» бағдарламасы бойынша Теміржол көлігінің қызметкерлерін бағалау және дамыту орталығында курстан өтті.
Үш жыл сайын өткізіліп тұратын аталған курсқа Нұр-Сұлтан, Алматы, Атырау, Ақтөбе, Орал, Шар, Аягөз, Жаңақорған, Арыс, Төретам станцияларының қызметкерлері қатысты. Солардың арасында «Нұрлы жол» вокзал кешені директорының орынбасары Нұрлан Аманжолов, вокзал басшысының кезекші көмекшісі Алмат Дусаев та болды. Оқыту барысында үйренгендерімен бөліскен олар емтиханды жақсы тапсырып шыққан.
– Оқу орталығының мұғалімдеріне әріптестермен кәсіби тәжірибе бөлісу мүмкіндігін беріп, кәсіби деңгейімізді арттыруға ықпал еткендері үшін алғысымызды білдіреміз. Бір апта ішінде алғашқы көмек көрсету, өрт қауіпсіздігі, электр қауіпсіздігі, өндірістік жарақат алу мен оның себептері, зерттеу жүргізу жұмыстары және тағы басқа тақырыптарда өте көп нәрсе үйрендік. Енді біз тек теміржолда ғана емес, барлық қоғамдық орындарда, үйде болсын аяқ астынан есінен танып құлаған адамға қалай көмек көрсетуді жақсы білеміз, – дейді Алмат Дусаев.
Курс аяқталған соң оның қатысушыларына емтихан барысында 60 сұрақ қойылған. Соның 60 пайызынан астамына дұрыс жауап бергендерге алдағы үш жылға дейін жарамдылығы бар сертификат берілген. Ал өте алмағандар үш жылдан кейін осы сынақтан тағы өтуі керек. Оқу аяқталғаннан кейін келген өңірден келген қатысушыларға «Нұрлы жол» вокзал кешенінде экскурсия ұйымдастырылды.